Madre slibo di cito Armnoyto b’Istambul

U hjomo, u qahar wi bcelıdbobutho mqabıl da citotho mşihoye b’Turkiya kul yawmo kzaydi komır u qoyumo du gabo Demoqratoyo da Came Garo Paylan.

 Bıthır mu tworo du Slibo di cito Armnoyto Surp Krikor, u qoyumo mqadamle rmoyto lu tahlufo du rişqutno d’Turkiya u mşayele mene mın tedbire kımaydi mqabıl da hjomani.

 Bıthır mu nısyuno du tewqido di cito Armnoyto ucdo ha farsufo şlıhle u slibo di cito d’Surp Krikor dkıtyo b’Stambıl  u mhalaqle bu darbo. Bıthır ma mamle dhawın me hın ma rişone du athro dkibın tahdide u bcelıdbobutho kımdawmi a hjome cala citawotho u dukothe hrene da came mşihoye.

Bi sbuthathe u qoyumo du gabo di HDP Garo Paylan mqadamle rmoyto lu tahlufo du rişqutno Erdoğan dıktolıb menne funoyo cala şuwole dkımşayıl bi sbuthathe.

Paylan bi rmoyteyde kımşayıl lu tahlufo Fuat Oktay u komır qay lıkmaydutu tadbire mqabıl da hjomani.

Qay lıkmakletu a hjome bcelıdboboye dkowın cala citawotho da Armnoye

Qay a rişone u mşale di şıltonutho lıkurhi a hjome dkowın cala citawotho, be bzabno en Erdoğan komır hani dıfayişi mu sayfo inaqayo aydarbo gıdkolın a hjomani. U qoyumo Garo Paylan bu huthomo da şuwoleyde komır en ahjomani dhowınwo cala masığde gıdfayşituwo şalye dılo hfuxyo.