02/12/2020

Maenza mwasafla i gaborutho d’MFS uqrobo dkobın mqabıl da jatawiye d’Turkiya b’Tel Tamır

İ mcadronitho du rişono du komisyon Amerikoyo di hirutho emwothoyto da tawdiyotho bı britho Nadin Maenza, mwasafla ahomuse di gaborutho du ağuno dkobele u Mawtbo Folhoyo Suryoyo d’MFS bi qastra dı Tel Tamır bu garbay madınho d’Suriya.

 Mayenza bi mıştawtfonuthayda athmıl li tahrazto d’şabtho kamılto b’Suroyo TV, naqla hreto sımla qroyto dmitıctarıf bi ruşmoyutho di mdabronutho yothoyto du garbiyo u du madınho d’Suriya.

 İ tahrazto d’şabtho kamılto dıkmıfroso b’Suroyo TV u dıkmiqadmo me Yahkub Mirza u Metin Rhawi, athmıl blalyo sımla baytoyutho li mcadronitho du rişono du komisyon Amerikoyo di hirutho emwothoyto da tawdiyotho bı britho Nadin Maenza dmıştawtafla li tahrazto bu darbo du skype.

Bu şuroyo du mamlayda, Maenza mahkela cali tahrazto di socuruthayda dımdawamwola yarho l’Suriya wi socuruthayda dımdawamwola şabtho lu athro du Iraq, u kalyo cala lqoyotho dhawiwola cama gabe folitiqoye u cama şutose mdinoye, marduthoye u kenşoye du camaydan ba tire athrawothani.

Cali hzayto dkıtla cali aykanoyutho du camaydan b’Suriya u bu Iraq, Maenza mırla “ida dımqaysina u Iraq cam Suriya, khozina da şartat frişene ba tire athrawothani. B’Suriya kito statu rakiwo di mdabronutho yothoyto demoqratoyto dkiba dhuyo mathlo standard la came du madınho mescoyo kulle. Elo bu Iraq camıhbol layto hawxa şartat u laytoste hawxa arcutho, cıl mıdmasrafwola ba milyare dolare laşan u snodo du dactid da qalilwotho umthoye u tawdithoye du athrano”. Bebzabno, Mayenza mawdacla di mdabronutho yothoyto latyo sniqoyto l’nasihutho laşan dhiya dqıdro dımdabro ruha, u hawxa mdawamla “i mdabronutho yothoyto kımathlo acame di fnitho kulle Suryoye-Othuroye, Kurdoye u Caraboye u kfılho laşan dımşarıro u nişo dkıtlın acamani dıkhoyın camıhdode. İ athtoste mıdla duktho rabtho b’gawıd di mdabronutho yothoyto, u kmiqadamla b’şawyutho bi sbutho di mathlonuthayda ba şutose folitiqoye, folhoye u momunoye di mdabronutho. U mede dkıtyo sniqoyto ele i mdabronutho yothoyto dmitıctarıf ebayo ruşmoyith xıd statu folitiqoyo dkıtyo falqo ma narcotho d’Suriya, bnişo dmitahwela fsoso dhowela esore i tagorutho cama nathrawotho dı britho”.

Camgabıdathe, Maenza mahkela cala Haylawotho du Sutoro da Neşe d’Bethnahrin d’HSNB u mırla aclaye dhani ahwothi di tawdithone, u makadlaste dıkmahwiyo iqoro rabo lu ağuno folhoyo dkobın laşan u sutoro du kenşathe. Bebzabno, i mşalonitho Amerikoyto mwasafla amharbone du Mawtbo Folhoyo Suryoyo wa zoxuwothayde mqabıl da grube mzayne marıhbone, u mawdaclaste dkıtyo ğalabe fsihoyto da mharbonani qadiri athmıl djıbri a jatawiye marıhbone dmıgroşi ma dukothathe hedor di mditho dı Tel Tamır. Calathe Maenza mawdacla du medano kobe diloyto l’MFS xıd haylo b’gawıd du koalisyon emwothoyo mqabıl Dacış.

Mxasra hreto, i mcadronitho du rişono du komisyon Amerikoyo di hirutho emwothoyto da tawdiyotho bı britho Nadin Maenza, mawdacla da Suryoye xıd camo hamicene ucdo dhınne dımdabri qarcıd d’ruhaye, u makadla dıklozım dmisım fulhone bu maşıqlano ducdo laşan a’Suryoye dqathlın azedqathe bu taro du lumodo d’Bruksel di şato da 2017.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…