08/03/2020

Mahıt 16 mılyone bnaynoşo bu karantina b’İtalya

Hol 16 mılyone İtaloye mahti bu izolasyon mu virus di Corona wu dukotho frişe du garbyo du athro sxiri, wa bnaynoşo klozım dmaydi fsoso leşan dı qudri cubri la qlimani.

 Bu mamlo dsımle u rişwazire d’İtalya Giuseppe Konte bu froshezwo du athro mırle; Mcal fothe du qentano di Corona, sımlan iclan u athro b’aykanoyutho şnızto.

U virus d’Corona, mbarbıs hol 100 athrawotho dıbritho. Ubu athro d’İtalya ucdo m’akıd dkito hol 5,800 dacwat hrene du virus d’Covid-19. I mawdconuthathe hiwo, bıthır mıd magle dkito 1.200 farsufe hrene dtafilın u virusano b’zabno d’24 şoce. Bi İtalya, mvayaclın 233 farsufe a hayathe mu kewano.

Bu mamlo dsımle u rişwazire Giuseppe Conte bu froshezwo ruşmoyo du athro mırle; Matina l’aykanoyutho şnızto wi şultonutho jbiro dmaydo tedbire casye, leşan dmaklena u virusano dımdawım dtofe. Calathe mdeli calu fusqono dmahtina u qlimo d’Lombardi u 14 qlime hrene bu karanten bu izolasyon.

Mawdıc ba dukothani kıhoye ebeye hol 16 mılyone wa dukothani’ste; Venice, Modena, Parma, Piacenza, Reggio Emilia, Rimini, Pesaro, Urbino, Alessandria, Asti, Novara, Verbano Cusio Ossola, Vercelli, Padua u Treviso’ne. U rişwazire tlıbleste mu camo dmoyıd i mşaluthayde u dlızze la dukothani dımbayni lu izolasyon. Camatheste ğalabe ma dukotho kenşoye xıda dukotho du shoyo, madraşyotho, du spor u ğer sxiri.