Mahwe hfuxyo mqabıl du hçomo dsim cali mdito d’Arbil

Emwotho Mhaydotho dıkrıhla uhçomo dsim ba soruhe cali mdito d’Arbil, maglelaste calu menyono dıqtili u dımçarhi bu hçomano dımhalıq ebe 14 soruhe.

 Camgabıdathe, Amerika, u koalisyon Emwothoyo, Almanya, Fransa, Britanya u athrawotho hrene mahwelın u hfuxyathe mqabıl du hçomo dsim athmıl cal Arbil.

 U malolo du koalisyon emwothoyo mqabıl Dacış Wayn Marotto, bi maqırhonutho dıfrısle bi dafayde du Twiter, mawdacle dıqtil bu hçomo dsim athmıl cal Arbil farsufo mdinoyo nuxroyo morıd şuğlone rabe, u mçarıhste 9 farsufe, baynothaye folho Amerikoyo wa hrene mdinoye dkıtne morıd şuğlone rabe. Bebzabno, u koalisyon mawdacle d’14 soruhe mhalqi athmıl blalyo cal dukotho mşahılfe bi mdito d’Arbil.

Camgabıdathe, i mathlonitho dilonoyto du notarrozo gawonoyo d’Emwotho Mhaydotho bu Iraq Jenin Plasxart, b’qaşyutho krıhla u hçomo barbroyo dsim ba soruhe cal Arbil, u sımla qroyto dıklozım dhowe şalyuthnafşo u methcadronutho qwitho bayn d’Boğdod u Arbil, bnişo dmiqadmi a’ganohe lu bethdino. Plasxart sımlaste qroyto dmisım u sutoro du Iraq mi qale da hayle baroye.

Ba hfuxye dmahwın ste, u waziro di baroyutho d’Amerika Antoni Blinken maglele calu ruğzo dkıtla Amerika mu hçomo dsim cal Arbil, u mırle “hawili esore camu rişwazire du qlimo d’Kurdistan Masrur Barazani, u drışlan i sbuthathe, u hulanste şudoyo dgıdsındina a’fulhone kulle da buqore udu myodo du hşowo ma hayobe”.

Me gabo hreno, u rişizgado Britanoyo bu Iraq u Hollandaste krıhe uhçomo cal Arbil, u tlıbe dmimıd hşowo ma hayobe, u mırlın; Gıdsındina u rişwazire du qlimo d’Kurdistan Masrur Brazani wu rişwazire du Iraq Mustafa Alkadhimi ba buqore dıkmisomi bi sbuthathe.

Mxasra hreto, u grub mzayno dıkqore ruhe u grub du ahıl du admo, bu buyono dıfrısla bu facebook mıdle calruha u hçomo dsim athmıl cal Arbil, u mdacele dımhalaqle 24 soruhe cal nuqazyotho da folhe Amerikoye, elo u grubano lımqadamle ithbate cali maqırhonutho dhule. U grubano dışme u ahıl du admo dmıdwole calruhe hçome dsımiwo meqım cala haylawotho du koalisyon emwothoyo, kımmathıl ha ma grube mzayne du gabo d’Hizballa du Iraq dıkmısnıd mu İran udkıtyo masro cam haylawotho d’Alhaşd Alşacbi.