Makthabzano d’Itotho (Fosuqo II.)
Mshihoyutho -2-
Ha ma sababe rabe di Mşihoyutho dmaqıblo haqqa xayifo, dıfriso wıdrawiho bu madınho mescoyo; idişutho, izılmiye wi meştacımronutho yani ukolonyalizm di imparatoriye d’Roma we. Wu sabab tatreste, ukenşo da catire da zınegın da Hudoye dkıtwın moro darcotho umoro dmal ğalabe dıkmidabarwo mu taraf da kohne Hudoye; dımvaxarwo ba haye di fıhşiye udıkmafıtwo krize uşuwole knuşyoye, kenşoye umomunoye we. Wan esore dkıtwo beyn da kohne da Hudoye uda hakome d’Roma, kmadırwo wık zolamwo ucamo dkıtwe quryoyo dıkcıyaşwo ba qıryawotho, a sayode da nune wa grece. Wu camo dlatwole tı haylo wıd cayıfwo mi dişuthathe; inaqla dıhzele uhaylano bı Mşiho, mhaymanle ebe wıbdele dızzeyo bethre. Ha dmahıt boloste, atalmide wa bnaynoşo qamoye dımhaymenne bı Mşiho; ya quryoyewın, ya sayode da nunewın, ya grece wın yastene memure nacimewın. Latwo baynotheyye şaxsat dkıtwın mi tabaqa umu sedro mu sunıf da hakome.
Ufroso di Mşihoyutho b’Beth-Nahrin’stene bcayni sababe elo bşıkıl hreno hawi. Ba zabnanık, Beth-Nahrin u Anatoliya’stene, tahti şultonutho utahti meştacımronutho da Rumoye wın. Camgabıdathe, acame dıkcayşiwo b’Beth-Nahrin, hedor d’600 eşne bu athraththe grece dğer came wıdğer şultonutho wın. Bethır mi hakimiye dmowat deşne da hakome nuxroye dcal Beth-Nahrin, ahhakomani markawwolın tekso di gracyutho calu athrano. Wannalohe dıkmıtyaqniwolın acame d’Beth-Nahrin, cal dlıkmamtanwo şroyo li aykanoyutho harutathe, utuxlono wi zuctho dkıtwolın acamani mqabıl dan Alohani mlaytowa utayimowa. Wan Alohanık a catiqe dıkmıtyaqniwolın acame d’Beth-Nahr,n udu madınho mescoyo dıkmastıri amdinotho, amacıbde, abnaynoşo wıdkobanwo bruktho;
lhınwo mu hawno umi haymonutho du kenşo. Ucamo Othuroyo-Oromoyo-Kaldoyo’stene dcayışwo tahti zılmiyathe udıkmidaşwo; ha ma came dlıkmıtyaqanwo fayış dan Alohe catiqe Marduk, Aşur, Hadad uğer Alohe dqudri dımcawnınne bu xususano. Mawxaste ucamo, notarwo ukımsaybarwo leşan dımqafele darbo du xalas ubahro malyo sabro leşane. Mu sababano, uyulfono wu ideoloji di Mşihoyutho dıhze xıd maxılsono, xayifo frıswo b’Beth-Nahrin.
U ideoloji dı Mşiho wi felsefeyde du xalas, hawınwo funoyo cevap lu mabco du camo. Mawxaste, falqo rabo mu camo Othuroyo-Oromoyo-Kaldoyo, mhayıd hedor di haymonuthathe dı mşiho uhawiwo ha guşmo. Uhawistene ucamo qamoyo dmaqbele i Mşihoyutho udımhalaxle bu darbeyda. Wu camo Othuroyo-Oromoyo u Kaldoyo, bethır mi nfaqto di Mşihoyutho, qre beşme uhatho dkıtyo Süryoyo aw Suroyo. Bu medanoste, ucamo Süryoyo camgabıd dkıtwole athro, mardutho, uleşono ha; hawiwo mored dıhdo tawdithostene.