Maqım u qonuno dmacçazwo u cameydan cali sbutho du zwono da mulkone bu Iraq

Ba mowat d’yaqrotho du camaydan dımgalwewolın meqım 16 eşne li mdito di Suleymaniye bu qlimo d’Kurdistan du Iraq, mitacçıziwo ma qonune dmahtiwo aclaye bi sbutho du zwono da bote u mulkone udi ruşmoyuthathe bi mdito.

Calathe, i mdabronutho gawoyto di Suleymaniye calu talab dhawilın a mşale da citotho du camaydan, fsıqla dmitaxifi a qayde dmahti cala 300 yaqrotho galwoye du camaydan dıkhoyın bi mdito.

İ mdabronutho gawoyto di mdito di Suleymaniye bu Iraq, fsıqla dmitaxifi a qayde dilonoye dmahti cala yaqrotho galwoye du camaydan bi sbutho di ruşmoyuthathe bi mdito. U fusqonano athi lu hwoyo bu knuşyo mşawtıfo dsim athmıl lu tbocofroso beyn du rişono di daira da macbar thumo awkith da pasporte di Suleymaniye wu rişono di marcitho di cito d’Mor Yusuf da Kaldoye qaşişo Ayman Caziz.

Bu knuşyano dımtayıb bi cito, qaşişo Ayman bu mamlo dsımle lu tbocofroso du Iraq mırle; Kito 300 yaqrotho Mşihoye bi Suleymaniye, i sagiyuthathe mgalwewolın me falge du Iraq beyn di şato da 2003 uda 2004. Mu zabnawo uhulucdo, a tedbire qonunoye dmahtiwo aclaye bi sbutho du fyoşo, di ruşmoyutho udu şqolo da bote uda mulkone, macjıziwolın ğalabe dilonoyith a farsufe dkıtne rabe bu cımro. Calathe hawilan talab mu mdabrono da Asayış umu rişono di daira du macbar thumo dmaxifi a tedbire dmahti cala galwoye Mşihoye.

Me gabo hreno, u rişono di daira da pasporte di mdito bu mamlayde mırle; A Mşihoye kcayşi qetre da tedbire qonunoye udi mşaynutho dmahti dilonoyith aclaye, u kıtlınste qetre du şqolo da mulkone udu hethotho di ruşmoyuthathe kull şato. Kito sniqutho l’fulhone sistamatik du byroqrasi. Mawxaste bi netiçe du amro dhiw mu mcadrono du rişwazire d’Arbil Qubad Talabani, sim knuşyo cam qaşişo Ayman u fsiq dmitaxifi a tedbire qonunoye dmahti cala ahunone Mşihoye.