Bıne park lu camaydan bi mdito d’Telesqof bi daşto d’Ninwe

Bi mdito d’Telesqof bi daşto d’Ninwe bu Iraq, sim u futoho du park awkith di gantho dmahıt ışma-i gantho du Korniş d’Telesqof.

U parkano dmahıt ebe u tarco d’İştar, mşatıs bi mcadronutho dhiwo ma comure d’Telesqof uda tukose noşoye dkıtne hfite bi daşto d’Ninwe.

Bi netiçe da fulhone magon udi mcadronutho da comure uda tukose noşoye, sim u futoho du park-di gantho du Korniş d’Telesqof, bnişo dhuyo nuqazto gawonoyto lu lqoyo kenşoyo da yaqrotho du camaydan.

Ardixlo Cisam Bıtrıs Hanko dımdabarle i tarmithathe, bi maqırhonutho dhule mırle; İ yarco dıbne eba u park di karxutho’yo, ubu zabno dsımwolan socurutho lu mdabrono di karxutho d’Telkepe, tlıbwolan mene dmıstacımlina i arcathe, u baroyo hulelan funoyo msimono dilonoyith du camaydan d’Telesqof sniqoyoyo l’duktho dmaşfıc eba u zabnayde d’casriye.

Hanko mawdacleste dhınne xıd mawtbo dıkmdabır a sebwotho d’Telesqof, flıhlın magon u maltamlın zuze ma comure di qastra, ma akore uma tukose noşoye, u camgabıdathe i karxutho d’Telkepe’ste mahıtla sahmo d’zuze, ubi netiçe mşatıs u parkano b’zabno karyo.

U park awkith i gantho d’Telesqof mahıt eba u tarco d’İştar dıkmgaşım ha ma remze makthabzabnoye du camaydan, u bebzabno gıdmitahıtste eba lohitho dıkmadilo cali yortutho noşoyto u makthabzabnoyto d’Telsqof.

Bu park du Korniş d’Telesqof kito maye, dawme, kursiye, kafiteryat, wahde da teştıcınye da nacime, bethbuşolo wu ucdo mtaybo’yo leşan dmisım ebe hage u ramşyotho.