05/01/2020

Maqırhonutho me Trump Calu Qatlo d’Suleymani

İ wazirutho du sutoro d’Amerika Pentagon maqbela dmişadır 3 alfo folhe Amerikoye lu Madınho Mescoyo, bıthır mu qatlo du rabhaylawotho İranoyo bı hjomo dsımla bı tayosto dlo pilot bu Iraq.

Athmıl casriye sımle u rişono Amerikoyo Donald Trump mamlo li umtho, calu cuqobo dsımlın calu rabhaylawotho İranoyo Qasem Suleymani bi arişkoyto du Iraq Boğdod. Bu mamlayde Trump mırle; Suleymani hani zabno yarikho mtayabwo plan, dhojım cal Amerika. Ahna’ste fayitina li harake leshan dmaklena u planano ulo leşan dmabdena qrobo.

Trump mırle’ste; Calu amro dhuwli, athmıl sımlın a folhe Amerikoyo cuqobo dı şafıc bı kaşirutho rabtho. Bu cuqobano qtil u marhıbono qamoyo dbritho-Qasem Suleymani, dımtayabwole plan bişe dhçome cala mathlone ucala folhe Amerikoye. Elo ahna huwlan funoyo meqım dımtayıb a planayde u maqımlan mi holo.

Bezabno Trump mahkele calu rabhaylawotho İranoyo dı qtile cılmoye dlatwolın hawbo u hawi celtho dı qaşi u kriz bu Madınho Mescoyo hani 20 eşne, u mıdle duktho’ste bu tuyobo d’plane dhçome marhıbone bi arişkoyto du Hınd u d’Britania. U rişono Amerikoyo thımle Suleymani dkıtyo bıthre da hçome dsimi adşabtho cali rişizgaduthathe b’Boğdod.

Bu huthomo mhanele Trump u gayso Amerikoyo cali kaşirutho da cuqobani u mzaharle u mırle; Amerika kıtla u gayso towo u caşino dbritho wa istixbarat qawye dbritho. En dmisım gzomo cal Amerika hayko dhowe bı britho, u nişaydan’ste mbayno’yo u ono hadiro’no dmoyadno a tedbire dıkluzmi-dilonoyith mqabıl du İran.

Me gabo hreno Amerika m’akadla dgımşadro 3 alfo folhe hrene lu Madınho Mescoyo wa folhani’ste i diloytathe, dsaymi cuqobe oyaroye casye’ne. Amerika heş me meqım mşadarwola 750 folhe lu Kuwait wu ucdo hadire’ne baroyo dobın funoyo lkull hçomo dgımiım aclaye leşan i mşaynutho di rişizgaduthathe b’Boğdod. Bebzabno mawdıc, d’Amerika sımla adyawma hçomo hreno qariwo l’Boğdod dhawi celtho lu qatlo d’6 farsufe. Elo hem u koalisyon Emwothoyo baroyo rfıdle i mawdconuthathe u bıthır Boğdod’ste rfıdla dsim hjomo.