Maqırhonutho mqabıl d’Turkiya cali sbutho di iqartho d’Diril

İqartho be Diril du kohno di cito Kaldayto du cameydan d’Stanbul Ramzi Diril  trela haşo rabo u qahar bgawe da hadome di İqartho u du cameydan.

 Gulçan Diril dkıtyo hıdo mi iqartho bi maqırhonutho dhula kımmo: Bu qahar ubi nefre dkıtli klozım mawqıdono lo belhude iqritho d’Mahre elo Şırnax kula.

Bi sbutho di iqartho be Diril dıhtifowa i emo u babayda 10 bu yarho d’Konun haroyo di şatathe, trela haşo u nefre beyn da hadome di iqartho, mqabıl da mşale qlimoye d’Turkiya dlıkımşayli cali sbutho u dlıkmakiwi rişaye eba. A hadome di iqartho ba maqırhonwotho dhuwlın, thımlın a mşale di şultonutho dlıkmcaqbi i sbutho.

I maqırhonutho harayto dfırsola Gulçan Diril bu Twitter kımmo: Bu qahar ubi nefre dkito acmi, lo belhude i qritho d’Mahre klozım mawqıdanwo elo Şırnax kula, hal hatuste dmıqtolowa emeyxu u babeyxu bşıkıl barbroyo, mın gıdsaymituwo.

A maqırhonwothani dkıtne malye hfuxyo mqabıl di şultonutho d’Turkiya mawdıc, ahna batilina u cajizina bu tlobo dmiqafın a qotole. Kminakfina fayış dıkuthwina, elo hatu layto lo nıkfutho ulo caybo cal fothayxu, bas toletu a qatole.

İ Gulçan wa hadome hırene di iqartho inaqla dıkkıthwi a kthawyothani, kımşadrilın lu tbocofroso d’Turkiya ula wazırwotho dkıtte asirutho bi sbuthathe, elo layto funoyo ulo me hıdo duktho. En ha dıhoze ba dafe da hadome di iqartho, kibe ha dmawrıx u tebo, wa dafathe kulle malyene ruğzo mqabıl da mşale du athro dlıkmakırxi maye bgalde d’ruhaye xıd komır u mathlo.