Markel mzaharla Turkiya bi sbutho du yamo mıscoyo

İ rişathwazire d’Almanya Angela Markel mzharla Erdoğan bi sbutho du kroxo du nafto bu yamo mıscoyo qariwo li Gozarto d’Qufrus.

Markel bi maqırhonutheyda mırla en Turkiya wu Yawnan dhowe qrobo baynothaye ahna gıdkolina cam gabe du Yawnan dkıtyo athro bu huyodo d’Urifi.

Hani zabno yarixo kito mwatyutho u droşe qaşye bayn lu Yawnan  Turkiya u Fransa bi sbutho du kroxo dcalu nafto u ğer catirwotho bu yamo mıscoyo dkıtyo bayn Turkiya l’Qufrus u dıgmote l’Libya wu Yawnan.

Ucdo anaqa Almanyaste mıştawtafla bi sbuthathe dıksındo u Yawnan u Fransa mqabıl d’Turkiya. Bi mawdconutho dıfriso bu tboco froso d’Almanya mawdıc d’Angela Markel i rişwazire du athro mzaharla u rişqutno du athro d’Turkiya Recep Tayip Erdoğan dkımharık u qlimo.

Markel bi mawdconutheyde mırla  u Yawnan lo haneke ksoyım mqabıl d’Turkiya en Turkiya dımşaryo dsaymo kroxo calu nafto awste dımşadro i sfitheyda du kroxo gıdnofıq taxtuşe şahine u hathe Turkiyayo mşalonitho acla.

Markel bi mawdconuthayede mırla Erdoğan klozım dodıc u şuwolo dkıtle camu Yawnan latyo belhude camu Yawnan elo camu Huyodo d’Urifiyo, en dhowe qrobo bayn Turkiya u lu Yawnan ahna u Huyodo d’Urifi mqabıl d’Erdoğan gıdhowina.

Markel bi mawdconutheyda mırla Turkiya provakasyon ksaymo camu Yawnan elo Turkiya tırmnaqyo matre darbone dkito en kıbco dmitahıt tadbire acla, awste kıbco dşıryo u qatro bu darbo da droşe.