Masrıh efesqufo hatho li marcitho du Iraq li cito Catıqto d’Madınho

Masrıh efesqufo hatho li marcitho du Iraq dkıtyo bebzabno mcadrono fatıryarxoyo li cito Catıqto d’Madınho.

U efesqufo hatho Mor Şamcun Danyal cam taşdarto ma hsayo di cito Catıqto d’Madınho, hawilın ytawto camu rişqutno du Iraq Barham Saleh.

Bi cito d’Yuldath Aloho bı Boğdod, sim yawme d’Huşabo dşaficina zawho ruhonoyo dmasrıh ebe qaşişo Danyal Alxuri Timathyos lu darğo d’efesqufo bu ışmo d’Mor Şamcun Danyal, u hawi efesqufo hatho li marcitho du Iraq u mcadrono fatıryarxoyo li cito Catıqto d’Madınho.

U zawho di masırhonutho sim bi rişonutho du wakilo fatıryarxoyo gawonoyo dkıtyo bebzabno u hasyo di marcitho d’Australya udı Newziland Mor Yacqub Danyel, ubi mıştawtfonutho du efesqufo du madınho d’Amerika Mor Gewargis Yunan wa kohne da marciyotho du Iraq u şamoşe cami gudo du koral di cito.

Lu zawhano dsim ebe mamle mu hasyo umu efesqufo hatho, hadır ste mathlone da rişone u şutose folitiqoye du Iraq, wazire, mşale mdinoye u folhoye, mathlone d’gabe folitiqoye u rişone tawdithoye cam menyono celoyo mi marcitho d’Boğdod di cito Catıqto d’Madınho.

Mxasra hreto, taşdarto ma hsayo u efesqufe di cito Catıqto d’Madınho baynothaye u efesqufo hatho Mor Şamcun Danyal mıstaqıbli lumıhreno bı Boğdod mu rişqutno du Iraq Barham Saleh.

Bi ytawtathe, Saleh dımhanele u efesqufo hatho du Iraq, makadle ste dıklozım a’galwoye du camaydan kulle dmitadcıri la fenyothaththe, udmisım u garanti di mıştawtfonuthaththe la haye folitiqoye, kenşoye u marduthoye.