Mtayıb cadcido u workshop b’Barıtle

Bi mdito Suryoyto d’Barıtle di daşto d’Ninwe, mtayıb u cadcido qadmoyo du şlomo tibeloyo.

Camgabıdathe, mtayıb tarte hfitwotho du workshop bi mdito d’Mawsal, leşan du sutoro dan athare udi yortutho d’Ninwe.

Athmıl casriye mtayıb b’Barıtle di daşto d’Ninwe, u cadcido qadmoyo du şlomo tibeloyo bi rocyutho du tukoso İtaloyo d’UPP. Bu cadcidano simi a hfitwothayde bu salon du hudro du sport di claymutho d’Barıtle, bu taro di tarmitho d’UPP dışma “fulhono magon leşan u şlomo b’Ninwe” ubu snodo momunoyo di wazirutho di baroyutho d’Fransa udu Huyodo d’Urifi.

Bu cadcidano kıtwo hfitwotho mşahılfotho marduthoye, kenşoye udi amnorutho, cam Pazar, gloho du rşomo, gloho du kthowe u gudo di musiqi dnqışla u dzmırla zmirotho calu şlomo. U mdabrono d’UPP bu Ciraq Ra’ed Mixayel Şaba bu mamlo dsımle, mawdacle du cadcidano kmıhşu hdo ma hfitwotho ulsoye dıksoyım UPP, bnişo dmitaqwiyo i şalyutho, udmişawşıt u mafhum du kenşo mdinoyo bu nfoqo mqabıl da casqıwotho.

Şaba mawdacle’ste dhawxa hfitwotho ulsoyene dmismi cal dıkmcadri bu terkiwo di şalyutho kenşoyto bu dactid dilonoyith bıthır mu huroro di hiğmonutho d’Ninwe. Bu taro di tarmithathe UPP mtayable b’Mawsal tre workshop dmıştawtaflelın zıd me 40 clayme u claymotho ma came u fenyotho mşahılfe d’Ninwe, cali sbutho du fulhono farsufoyo u mkanşo magon, u sutoro dan athare udi yortutho d’Ninwe wu tenhiro du camo leşan dnofıq moro lu makthabzabnayde.

Bıthır mıd kamili a workshop, a clayme mıştawtfone mabdelın kampanya leşan u sutoro da athare udi yortutho d’Ninwe. İ kampanyathe dmahıt ışma “latne belhude kefe” mabdiyo b’tarte nuqazyotho makthabzabnoye b’Mawsal dkıtne Baştabya wu tarco d’Masqa.