Matfıyo i nuro dan arcotho di qritho du Sedari b’Turcabdin

SEDARI, Turcabdin — Bu zabnano dkowe mattre u tavat qaşye b’Turabdin u acmaye’ste hawa qwitho, kibe dhowe gedşe dqudho i nuro ban arcotho da qıryawotho du qlimo. Cami hawa qwitho dkowe’ste, xayifo kmibarbızo i nuro beyn ilone u gelone naşife.

Athmıl bıthır mi tave dhawyo, nafıq nuro ban arcotho du Turo d’İzlo qariwo li qritho du Sedari. A comure di qritho du Sedari u d’Arkah dhzelın i nuro, baroyo nafiqi leşan dmatfannla. Lfuth i mawdconutho dmatilan beyn 30-50 clayme da qıryawothani dlo kıloyo huwlın mrodo zabno d’3 şoce u matfelın bi harayto i nuro.

Bu video dfrısle Mzizah News, an abne du camaydan u mahkelın calu kyono da gedşani dkowın u mqadamlın a tahınyothathe la şutose frişe du camaydan dkıtne bi golutho cali tarnitho mşawtafto dsimwolın meqım kmo eşne, u dzwınwolın mınyono makinat du tetfiyo di nuro la comure da qıryawothaydan b’Turabdin.