08/08/2025

Mathkiri a 92 eşne du qtolcamo d’Simele

U gabo Othuroyo Demoqratoyo d’Suriya mtayable bi mditho dı Tel Tamır hfitutho ruşmoyto u camonoyto, bi cohnutho du yawmo du sohdo Othuroyo dkıtyo u duxrono da 92 ışne du qtolcamo d’Simele. GABBA bu mamlo dsımle bi hfituthathe, makadle i ulsoyutho du nfoqo du moro lu cuhdono mkanşo, udu snodo di ciyeşe mşayanto bu garbay madınho d’Suriya. GABBA makadle ste du admo da sohde du camaydan gıdfoyış dhowe şroğo laşan dımdawım u ağuno di hirutho udi kinutho.

08/08/2025

KHABUR/ZALIN, Beth Nahrin — Bi rocyutho du gabo Othuroyo Demoqratoyo d’Suriya GABBA, u camaydan u Othuroyo dıkhoye bi mditho dı Tel Tamır bu kanton di Gozarto d’Bethnahrin d’Suriya mathkarle athmıl bıhdo hfitutho ruşmoyto u camonoyto u duxrono şatonoyo du yawmo du sohdo Othuroyo dıknofıl 7 bu yarho d’Ob dkıtyo u qtolcamo d’Simele. 

I hfituthathe dımtaybo bu salon di cito d’Qaddişta dıknıflo bu mesco dı Tel Tamır, hadırla menyono celoyo ma mathlone da hayle folitiqoye u tawdithoye, u taşdaryotho ma came mşahılfe dı Tel Tamır Suryoye, Kurdoye u Caraboye, cam taşdaryotho hrene ma şutose du kenşo mdinoyo, u menyono d’hfite bu haqlo kenşoyo u marduthoyo. 

U zawho di hfituthathe mşarele b’qatinto d’şetqo cali ruho da sohde, ubıthır mathe u mathlono d’GABBA Wael Mirza sımle mamlo bışmıd du gabo Othuroyo Demoqratoyo. Mirza bu mamlayde makadle du yawmo du sohdo Othuroyo kımmathıl nuqazto du duxrono da qtolcame dsimi calu camaydan ubi qadmoyuthaththe u qtolcamo du Sayfo bi şato da na’1915, u mawdacle ste du camo Othuroyo gdımdawım dımdafıc i şkihuthayde wi hiyoyuthayde cıl ma fulhone dkımnasın dlohın u camano udıdayşile. 

Mirza mırle ste “adyawma klaymina laşan dımmina lıbritho d’ahna lıktocina a’sohde du Sayfo uloste a’sohde du Xabur, kmadhkırina kul man dbıhle ruhe laşan du neshono du camayde udu fyoşayde. Ukım’akdina du ağunaydan gdımdawım hul dmitahwelan a’zedqaydan bu athraydan b’gawıd d’sistem demoqratoyo lo qentrunoyo dıksoyım u garanti di kinutho udi şawyutho la came kulle”. 

M’gabo hreno, i mtakasto Othuroyto Demoqratoyto ADO bu buyono dıfrısla bu yawmo du sohdo Othuroyo, grışla u zuhoro calu qtolcamo barbroyo dsim bıthır mıdşafıc şato hdo cali mşatsonutho du athro hatho du Ciraq bi qritho mşayanto d’Simele bi şato da na’1933 mi xasra da haylawotho ruşmoye du gayso Ciraqoyo. ADO bu buyonayda mawdacla du qtolcamo d’Simele athi luhwoyo xıd funoyo lu ağuno dkobewole u camaydan dkımtalabwo dmitahwewole a’zedqayde xda came hrene du Ciraq. ADO madhkarla ste dıdbih bu qtolcamo d’Simele dsim qum d’caynothıd di şultonutho Britanoyto bu zabnawo, zıd m’5 alfo sohde mu camaydan baynothaye sobe u neşe u nacime.