Mathlone d’şutose da came frişe b’Suriya, hawilın ytawto cam Die Linke

BERLIN — Athmıl mtayabwo bi mdito d’Berlin d’Almanya ytawto dilonoyto leşan dmıgrış u zuhoro calu qtolcamo, cala taxtuşe ucala gunhe haroye dhawın cala qalilotho frişe b’Sweda u gawonoyith bu athro d’Suriya. Li ytawtathe hadır mathlone u mşale d’şutose frişe da Druz, da Callawiye, da Caraboye, da Kurdoye, da Ezidoye u xıd mathlono du camaydan, mıştawtafle Metin Rhawi mu Huyodo Suroyo d’Urifi-ESU u hadırwo ğer şutose hrene du camaydan’ste bi ytawtathe.

İ ytawtathe dımtakso mu tahlufo du gabo d’Die Linke bu parlamento d’Almanya-Jan Van Anken umi folitiqorto du gabo-Çansu Özdemir u hadırla u tbocofroso du athro. Calathe u lqoyano frıswo bıthır bi sfaryawmo d’Almanya-Tagesspiegel ubı ğer dafe hrene. Bu şuroyo di ytawtathe, hiwo i aftho qamayto du mamlo li mathlonitho da Druz-Evlin Assaf dmahkela cala şuşote haroye d’Sweda.

Mathlono hreno da Druz Tareq Alaow grişle u zuhoro cali taglitho dsimo qum du bınyono di wazirutho di baroyutho d’Almanya. Bıthır Metin Rhawi mıdle i meltho u bşıkıl rwiho mahkele cali aykanoyutho du camaydan uda qalilotho hrene dkubci şlomo u demoqratoyutho b’Suriya, dıqle calu maşıqlo folitiqoyo hatho, cala dyoşe da zedqe wa hawbe dsimi cala qalilotho şerşoye du athro.

Rhawi mahkele’ste calu pluralim, cali Mdabronutho yothoyto u aydarbo dkiba dhuwyo model lu Madınho Mescoyo kule ubebzabno, dkull noşo kıtle zedqo dobe u renyayde leşan haye b’sistem demoqratoyo. Bıthır mu mamlo d’Rhawi, hiw darbo la gelyunore dımşayli a şwolathe u mqadım renye u hzayotho u hawi droşo yarixo beyn da hadire calu şıkıl di mdabronutho du athro bu dactith wu Almanya mın dawro kiba dmıştacyo bi sbuthathe.

A hadire tlıbbe u mbahase ba mamlathe du rişono d’Ahmad al Şarıc-Al Jolani lo naçıh bi wolithayde u dıklozım dmihaşıw cala gunhe dhawın, uda rdufye, cnufyo u qatlo da bnaynoşo klozım baroyo dmitakle u dmisım buhone şarye leşan dmihaşwi a hayobe da qatle da Mşihoye, da Druz uda Callawiye. Bebzabno tlib dmitakle u şedoro da mcadronwotho, yaste dmıfloği bşıkıl kino lkull noşo. İ mcadronuthathe klozım dhuwyo b’duyoqo leşan dmıtyo li duktho dıklozım. Camathe tlib dhowe mawdyonutho folitiqoyto ba qalilothani u dımdawmi dhowın bi tablitho da droşe udu tuyobo du nomuso esonoyo d’Suriya.