26/05/2020

Mazloum Abdi yatuw camu rabhaylawotho dcala cuqobe dilonoye du koalisyon emwothoyo

U rişono gawonoyo da Haylawotho d’Suriya Demoqratoyto, rabhaylawotho Mazloum Abdi, hawile ytawto camu rişono Amerikoyo dcala cuqobe dilonoye du koalisyon Emwothoyo, rabhaylawotho Erik Hill.

 Hıdo ma sebwotho rişoye dıdrişo bi ytawtathe, u teqwiyo di methcadronutho beyn da hayle d’QSD udu koalisyon Emwothoyo bu ağuno mqabıl da ğrobe marhıbone d’Dacış’wa.

Lfuth u tebo dıfris athmıl, u rişono gawonoyo da Haylawotho d’Suriya Demoqratoyto rabhaylawotho Mazloum Abdi, mıstaqbele yawme d’Huşabo casriye u rişono Amerikoyo dcala cuqobe dilonoye du koalisyon Emwothoyo rabhaylawotho Eric Hill leşan durşi u teqwiyo di hawrutho dkito bu ağuno mşawtıfo dkobın mqabıl da ğrobe marhıbone d’Dacış b’Suriya.

U rabhaylawotho Abdi u Hill, drışlınste şıkıl d’strateji noşoyo leşan a 10 alfo marhıbone msikoye ba dukotho d’QSD u aydarbo gıdmaydi snodo Emwothoyo leşan u şroyo du qetrano da marhıbone. Bebzabno Hill u Abdi makadlın cali sniqutho di masirutho dkito leşan u teqwiyo da esore udi methcadronuthathe bu garbay madınho d’Suriya.

Bi ytawtathe a 2 rişone, drışlın aydarbo Dacış mnasele dsoyım hjome marhıbone qaşye bu zabnano dkımdawım u virus d’Corona ubu zabno da Maşılmone kımcaydi u cedo du Ramadan bnişo dmaqwın u haylathe. Mawdıc d’walaw Dacış mvayacwole i xilafayde bu yarho d’Odor da 2019 bıthır mıd ğlib ban arcotho d’Suriya ma hayle d’QSD wu koalisyon Emwothoyo, a krılyotho da marhıbone heş kımdawmi dsaymi hjome cala dukotho dımharıri me QSD.

Bu taşroro dfrıswolın a mbahnone d’Pentagonste cala 3 yarhe qamoye di şatathe makadwolın, da hayle d’QSD huwlın ağuno bı gaborutho rabtho mqabıl da marhıbone, elo a krılyothathe heş kımdawmi dsaymi hjome nacime hem b’Suriya u hemste bu Iraq u kımnase dmohe dharbo la hayle di mşaynutho uda mdabronwotho qlimoye d’Raqqa, Hasake u Deyr Ezzor.

U koalisyon Emwothoyoste bı fusqono kamiloyo dımdawım i hawruthayde cam QSD mqabıl d’Dacış u dımnase dımcadır bi mşaynutho ubi şalyutho du qlimo. Ba yawmotho dı şafıcinaste mawdacwolın a hayle d’QSD dsımlın cuqobe frişe b’Deyr Ezzor u qtilın u msıklın mınyono d’marhıbone d’Dacış ubğer cuqobe mşawtıfe dsimi camu koalisyon, qtılwo 2 rişone du tukoso.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…