Menyono celoyo mu camaydan bi şatathe sımle socurutho lu qlimo d’Turabdin

Menyono celoyo mu camaydan u Suryoyo bi şatathe sımle socurutho la mdinotho u qıryawothayde dkıtne b’Turabdin.

A socorwothani grışın u zuhoro du tboco froso Turkoyo u sim tebe cali sbuthathe.

Bu tebo dı fris b’mınyono ma froshezwe uma mğale Turkoye kmitawdıc,  a suryoye dıkhoyanwo b’Mırde, b’Mıdyat uba qıryawothaththe dımgalwewolın l’athrawotho frişe d’Urifi, leşan dobın funoyo li lhiquthaththe bu zabno du batlono qaytoyo dkıtlın sımlın socurutho la dkothe dmawlıdi u d’yariwi bınne.

Hıdo ma qıryawotho dıkmıgrış zuhoro acla hawyo i qritho d’Anhıl. U bcayni zabno kmişalıt bahro cala Suryoye di golutho dmacmarre a botaththe bi qrithaththe. A comure Suryoye di qrithathe hani tarte ışne mfothıd di korona lo qıdriwo dızzınwo lu athraththe. Elo ad şato a Suryoye mıdde u darbo di qrithaththe.

Bu tebo kmitawdıc, i cito d’Mor Eşacyo wi cito d’Mor Quryaqus ocdo hawın nuqazto da Suryoye d’Urifi dloqın hdode tamo. Bcayni zabno sim maqıblonutho cam İskender Akkaya dımgalwewole l’Almanya meqım 52 ışne, u bıthır me 25 ışne dsımwole socurutho li qrithayde. Bi maqıblonutho İskender Akkaya mırle “25 ışne lathinowo li qrithaydi. Ocdo ğalabe fsiyono. Harke kızzan li cito, u kulayna kıhzena hdode.”

Bi harayto du tebo kmitathkır,  a Suryoye dımgalwelın la athrawotho frişe d’Urifi bnelın u mhathaththe hol 200 bote ba qıryawotho d’Midyad.