Mhase u ahuno dha ma mşatsone qamoye du froshezwo d’Suroyo TV Robel Varli

GIESSEN, Almanya – İsa Varli ftıhwole caynothe li brithathe 20 bu yarho d’Teşrin u qamoyo dan 1954 bi mdito mbaraxto d’Mıdyad, me abohe mhaymne Shabo u Niçme Varli. U mhasyo, kıtwole’ste ahunone u ahwotho; Albert, Ferid, Robel, Zaho u Suheyla. U ahuno du mhasyo İsa-u Robel, ha ma mşatsone qamoye du froshezwo d’Suroy TV’yo ubebzabno sanodo u hfito ba fulhone umthoye du camaydan’yo.

U holo İsa mafıtle a hayayde b’Mıdyad u qrele i madraştayde b’kaşirutho rabtho u xıd şamoşo’ste xodamwo i citayde. U mnoho dkıtwe sahoyo towo, qrewole 3 eşne b’Stanbul uban 1977 mhayadwole a hayayde cam Linda Varli b’Holob d’Suriya. Mu zwoğano Aloho huwlelın 5 nacime u kıtle’ste 5 nubğe. Bi şato dan 1970 mgalwewole l’Almanya leşan u yulfono bi bethsawbo d’Darmstadt.

Uban 1990, ftıhwole şırkayde b’Giessen xıd Mohuro-ingenjör ubnele hol mo bote; d’sahmo menaye du camaydan’wın u bnewole’ste citotho. U holo İsa rahomo du camayde udi marduthayde’we u hfitowe ba sicotho da citotho d’Mor HadBşabo ubi cito d’Mor Barsumo. Bebzabno u mnoho hfito’we bu haqlo folitiqoyo ubu gabo d’CDU bi karxutho d’Giessen u mraşahwo’ste lu parlamento d’Urifi.

U mhasyo farsufo drohamwo i iqarthayde wu ahılayde u dlodacwo i zuctho mınyo u kull naqla mathalwo i qonunyutho. Elo bıthır eşne yarixe d’kewo mayiro, maslamle u mhasyo du holo İsa i amanayde lu muryayde. Ramhıl 5 bu yarhano’ste, gıdmisım u cufoyo du mhasyo bi cito d’Mor Barsawmo u gıdmitahwe lu cafro ba bethqbure di mdito. Wu yawme d’Huşabo’ste gıdmisım jınnaz lu mhasyo bcayni cito.