Mi’akdo i hiyoyutho da 10 qtiloye du hçomo di Örebro

ÖREBRO – U froshezwo du Swed mawdacle du polis, mkamele a fulhonayde leşan dım’akıd i hiyoyutho da 10 farsufe dqtiwo bu hçomo barbroyo dsımwo bu şuroyo di şabthathe bi mdito d’Örebro. Beyn da qtiloye kito 7 neşe u 3 gabre ubu cımro ma 28 eşne uhola 68 eşne’wın wi sagiyoyuthathe, kıtte şerşe dğer athrawotho.

U farsufo da 11’ste Richard Andersson’yo dsımle u hçomano u barbroyo u cımre 35 eşne’yo, elo heş latyo u nişo du hçomano idico. U polis dmawdacle i netiçe da buhonani la yaqrotho da dıbhe, mahwe hfuxyo qaşyo cal dgrışle hawxa zabno yarixo. İ sbutho du hçomano, grışwola’ste u zuhoro du ajans da tebe d’Reuters.

Bu tebo dfrısle u ajans cal Salim İskef dkıtwe 28 eşne umu camaydan d’Holob u mgalwewole lu Swed ba 2015, u mahke calu caza dsim athmıl bi cito Suryoyto Orthodoksoyto d’Yuldath Aloho dhadırle hol 500 bnaynoşo u hawi mamlo camu kohno di cito. Lfuth u tebo d’Reuters, kito farsufo hreno dıkmıjğıl u leşono Suryoyo beyn da farsufe dımçarhi elo lo mawdıc ışme.  

Camathe’ste mahke calu plan d’Salim İskef dgımizawağwo bu yarho d’Tamuz wu haşo rabo dıkcayşo i nxirayto wi iqarthayde. Meqım dımvayıc a hayayde’ste sımwole Salim telefon u tlıbwole xatır mi emo umi nxiraytayde. Bu tebano’ste friş duktho cala rdufye dıkloqe u camaydan b’Suriya u aydarbo jbir li golutho.

Reuters d’mawdacle dkito hol 200 alfo Mşihoye bu Swed dkıtte şerşe mu Madınho Mescoyo-5 alfo menaye b’Örebo kıhoyın. Bıthır mu hçomano, i şultonutho du Swed mawdacla dgıdorşo me hatho i sbutho da qonune di morutho da zayne bu athro.