Mcal fothe da hçome da hayle kaboşe d’Turkiya maxle athmıl tloth qıryawotho hrene d’Nuhadra

BETH NUHADRA, Ciraq – Mcal fothe da hçome da hayle kaboşe d’Turkiya calu garbyo du Cıraq wa taxtuşe dıkmdawmi camu gerilla di PKK, maxle athmıl tloth qıryawotho hrene d’Nuhadra. A tloth qıryawothani dıkfayşi bi fnitho d’Dinarta b’Caqre, maxlın bıthır ma cuqobe oyaroye dsımla Turkiya wu gzomayda d’cuqobe di naşfe bu qlimo.

A 3 qıryawotho d’Npaxe, Berkakure u Kafya dıkfayşi ba turone d’Gare bu garbyo du Cıraq, midi nişo la cuqobe da hayle kaboşe d’Turkiya umcal fothe da taxtuşe qaşye dhawın camu gerilla di PKK, jbiri a comure da qıryawothani dmaxlın a botathe. Ba hçomani d’Turkiya, mawdıc dqtil 2 mdinoye di qritho d’Kafya.

Lfuth tukoso noşoyo dıkmcaqıb a cuqobani d’Turkiya calu qlimo, ba zabne haroyani maqşela u mazıdla Turkiya a hçomayda cala dukotho du gerilla di PKK bu garbyo du Cıraq u kito qento, dmitabde’ste cuqobe di naşfe camgabe da hçome da tayosyotho dlo pilote d’Turkiya.

Me gabo hreno lfuth mabuce du qlimo, farsufe dkıtne masre bu MİT d’Turkiya udi KDP kıkurxi beyn da qıryawotho d’Gare u kımhadıdi a comure u kımmi; En dlo nufqitu mi qritho bu yarhano, hatu kıtucnitu i mşalutho da hayathxu.

Mcal fothe da cuqobani d’Turkiya cal dukotho frişe di hiğmonutho d’Nuhadra, maxle 183 qıryawotho ma comurathe u kito 602 hrene bu qento d’xolın. Mınyono ma qıryawothani’ste du camaydan dıkhoye bu qlimano’yo dıkmıjbır l’golutho bıgawe du athrayde.