Monğolia gmıstacmılo i alfabet Suryoyto

U bethsawbo d’Mırde d’Artuklu mawdaclın dıgfıthi dawrat du yulfono du leşono suryoyo ba lecze dkıte calu darbo du nawlo, mawxa me kul duktho kibın afarsufe dyılfi u leşono Suryoyo.

 Me gabo hreno i şultonutho d’Monğolia mawdacwola bu yarho d’Odor dı şafıcina, dkıtla tahrazto dımşaryo dmıstacmılo naqla hreto i alfabet-i olaf beth catıqto me darbe di hathto, dmıstacmılowa ban 1940.

A dawrat du yulfono du leşono dgımşarın bu yarho dıbqamutheyna kibe man dobıc dmıştawtaflın inaqa dobe a time da dawrat du leşono Suryoyo dıgdowın bi mdiqonutho du malfono du leşono Suryoyo Adem Coşkun  Hanno.

Ba dawrani kibe ha dyolıf u leşono Suryoyo calu darbo du nawlo awkith kul ha mu bayto kibe dmoyıd yulfono du leşono Suryoyo.A yolufe dkımkamli a dawrani kmitahwelın sohdwotho d’yalifi u leşono suryoyo, wa sohdwothani gıdhowın calu darbo du bethsawbo metul da dawrani gıhowın calu darbo di Bethsawbo.

18 bu yarho d’Odor dı şafıcina, mawdacwola i şultonutho d’Mongolia dkıtla plan, dımşaryo bu isticmal i alfabetayda i catıqto holi şato da 2025, bı dukthe di kathawto Cyrillic dımşarewo bu isticmalayda ban 1940 bu zabno du athro dkıtwe bide d’Rusya. Leşan Mongolia dnufqo mu tathirano d’Rusya, kıbco ducro la şerşayda bu haqlo di kıthawto.

Me gabo hreno i alfabet marduthoyto catıqto d’Mongolia, kmıntır dmitıstacmılo bu haqlo du elektronik, du yulfono, du arşiv da makthıbe ruşmoye du athro uğer. Bu şıkılano, gıdmıjbır u tboco froso wa madraşyotho dmıstacmıli a 2 kthawyotho. Elo u planano, flığle ışmo u camo me hıdode, cal 3 milyone kıkuthwi bu Cyrillic uhol 6 milyoneste kmıstacmıli i alfabet catıqto.

Ba 800 eşne haroyaniste, mıstacmela Mongolia kıthawyotho frişe u hıdo ma kathawyotho qamoye ikthawto dmidole u athro ma Uighurwe wu camanoste, mıdwole i kthawtathe mu camaydan du İran awkith mu leşono Suryoyo. Lfuth u tebano, ikthawto Suryoyto nqilowa l’Mongolia mu Jengiz Khan ban 1204. Elo idicoyoste, da mbaşrone du camaydan di cito Madınhoyto Şlihoyto matınwo lan athrawothani d’Asia.