Turkiya kıbco zawno a zayne S’400 me Rusya

İ sbutho du zwono da zayne d’S 400 d’Turkiya kıbco zawnolın me Rusya hawi qatro du rişeyde lıkmidıc b’idothe d’manyo.

 Me Rusya kothe mawdconwotho mşahılfe hın mane kımi mdelın u qyomo u hın mane kımi i şato dothe, u mu gabo d’Amerika kımdawmi a tahdide dımqabıl du zwonano.

Xıd kıtyo idico Rusya mşadarla hın ma falqe da zayne d’S 400 elo a tebe d’ucdo kmıfrosi ktorın otho d’Şuwolo b’mehe dkul noşe, metul u mşalo di şirke d’Alexander Miheyev  komır Turkiya mdela u qyomo trayono d’S 400 da zayne elo me gabo hreno umşalo d’Rostec Sergey Cemezov mawdacle dbi şato dothe gıdmodın uqyomo trayono da zayne.

Bu şıkılano kmahwe d’Turkiya lımdela qyomo kamilo da zayne mawxa a falqe da zayne kamiloyith lımatın l’Turkiya.

Bi şato d’şaficina  Rusya mşarewola dımşadro a falqe da zayne d’S 400 l’Turkiya, bu zabnawo u rişqutno Recep Tayip Erdoğan mawdacwole bu zabno du rabıc di şatathe gımşarın bu nısyuno da zayne, elo fayıt u rabıc heş layto mede dıkmahwe elo ucdo knofıq tebe dheş u qyomo bkamilutho latyo madyo.

Bi sbutho da tebani aharoye dkothe me Rusya amşale d’Turkiya lı mawdaclın mede, bram mu gabo d’Amerika kmitakrıh dı latne thınihoye bi sbuthathe xıd mırlın me meqımste, ucdo mawdaclın dıg maqşın a tadbire dımqabıl d’Turkiya en Turkiya dmıstacmılo azaynani dlıgrıkwi calu sistem da zayne du Nato dkıtla b’Turkiya.