30/01/2025

Mor Afrem laqi Geir Pedersen u mirle “kito zuctho rabtho u casqıwotho dıklozım dmişahılfi l’gade hathe”

DARIMSUQ – İ qadişutho du fatıryarxo Mor İğnatiyos Afrem Trayono, mıstaqbele athmıl sfarayto, bu qentrunayde u fatıryarxoyo bı Darımsuq, u mathlono dilonoyo d’Emwotho Mhaydotho b’Suriya Ger Pedersen cam taşdarto mu makıthbayde dıkmişaklo mu mşalo rişoyo da sebwotho folitiqoye Robert Dan, i mşalonitho da sebwotho folitiqoye Marwa Cali, u mcadrono dilonoyo du mathlono emwothoyo Galimjan Kirpasov, u mşalo da sebwotho folitiqoye Faysal İrşad wi mşalonitho athronoyto da sebwotho folitiqoye Ranin Maxxul. 

Li ytawtathe mıştawtafle ste u fatıryarxo da Suryoye Malkoye Qatholiqoye Mor Yusıf Alcabsi, u wakilo fatıryarxoyo da Suryoye Malkoye Ortodoksoye bı Darımsuq efesqufo Romanos Alhannat mathlono du fatıryarxo Mor Yuhanna da 10 Alyazaji, u mcadrono fatıryarxoyo da Suryoye Malkoye Ortodoksoye efesqufo Musa Alxuri wu rişono di cito Evengeloyto b’Suriya qaşişo Bıtrıs Zacur. 

Bi ytawtathe, fatıryarxo Afrem bu mamlo dsımle mahkele cali aykanoyutho gawonoyto d’Suriya u mırle “u şuhlofo dkowe b’Suriya ğalabe ulsoyoyo, elo kito zuctho rabtho u casqıwotho dıklozım dmişahılfi l’gade hathe, laşan u bnoyo d’Suriya udmicadri an’abnayda dcayşi b’neshono ub’hirutho”. 

M’gabo hreno, u mathlono emwothoyo Pedersen mahkele cali aykanoyutho d’Suriya bu maşıqlano ducdo, ucala sniqwotho dkito b’gawıd du athro, u aydarbo kibe dmisım u quyomayde udmişawşıti a’haye kenşoye u momunoye b’Suriya. Pedersen mathkarle ste dıklozım dmıflıh calu asas da prensibe di barmothoyutho, di demoqratoyutho, di kinutho udi şawyutho la bnaymothoyayda kulle.