31/01/2025

U qatlo du hfito Salwan Momika b’surhobo mbarbız bu tbocofroso dbritho u mahwe hfuxye frişe

U qatlo du hfito Salwan Momika dkıtwe cımre 38 eşne, b’surhobo mbarbız bu tbocofroso dbritho u mahwe hfuxye frişe. İ sbuthathe du qatlo d’Momika-dkıtyo mu camaydan wu idico bu Swed, bu tewqido du kthowo du qurcan da Maşılmone, xlıqle droşe hathe b’athrawotho frişe cali tawditho Maşılmonitho ucalu zedqo du maftahfemo.

SWED – Salwan Momika dkıtyo mu camaydan du Cıraq, idico bu Swed bi klaytayde mqabıl da Maşılmone, xlıqwole hfuxye ban athrawotho Maşılmone wu Cıraq’ste tlıbwole mu Swed dmitaslamle Momika leşan dhokamle lfuth a qonunayde. Calathe u qatlo d’Momika b’Södertelje, mafsahle a Maşılmone du Swed u dbritho.

Elo camathe’ste, u qatlano d’Momika xlıqle droşe hathe bu tbocofroso kenşoyo d’athrawotho frişe; beynothaye u Swed, Fransa, Hollanda uğer cali tawditho Maşılmonitho ucali ulsoyutho du hefodo du zedqo di hirutho du maftahfemo. Dilonoyith b’Fransa kmifaşıq u qatlano xıd hçomo cali demoqratoyutho.

Bebzabno bu Swed’ste ba tebe dfrisi mawdıc, du qatlo d’Momika latyo belhude hçomo acle xıd farsufo, elo hçomo calu Swed’yo wu polis, lo qadır dımhamele. Mawdıc’ste d’5 farsufe msiki ma thome di asirutho du qatlo d’Momika elo heş i celtho du qatlayde latyo idıcto.

Ba nuhole dsimi calu qatlano mawdıc’ste; En u qatlano sim me ğrobe tuhmonoye, ya me istixbarat nuxroye u yaste me ğer hayle-u qatlano dharbo’yo li hirutho du renyo hiro udu maftahfemo du Swed uli hirutho dmisomo i Maşılmonutho sturyo. Hani dqtilın Momika, lıgfayşi bu qatlano u kibe dothın dımşakli gzomo l’ğer farsufe dkıtte renye u hzayotho frişe.

Me gabo hreno b’tebo hreno dfris b’dafo Hollandoyto mawdıc, d’lfuth u rişwazire du Swed Ulf Kristersson, kito gado rabo d’athro hreno bıthre du qatlano d’Momika’yo. U rişwazire mırle; A hayle di mşaynutho du Swed-SEPO cabiri bi dacwathe u mabdelın buhone, cal dkito qento di sbuthathe dhuwyo masırto b’hayle baroye.