Mor Afrem Trayono bi egartheyde ksoyum qreyto la Suryoye dnıfqi moro li marcitho d’Turcabdin

İ fatıryarxutho di cito Suryoyto ortodoksoyto frısla egartho dıksaymo eba qroyto la Suryoye Turcabdinoye dnıfqi moro li marcitho d’Turcabdin dkıtyo bi rişonutho d’Mor Timoteos Şmuel Aktaş.

 Bi egarthathe dkıtyo dilonoyto la turcabdinoye dkıtne bu athro ubi golutho, kmıtlıb dnıfqi moro l’Tucabdin, udı matici lu rişono di marcitho udımhalxi lfuth u sebyonayde.

Bi egarthathe dkımşaryo la Suroyoye turcabdinoye kmitahke cali ulsoyutho du athro d’Turcabdin d’ebe mnatro i haymonutheydan u ebe mşawşıt u leşoneydan u suryoyo wa timoyotho hrene dımşawşatle u camo Suryoyo.

U cameydan dı cayış b’Turcabdin mafıt mu sayfo u mrore sagiye, wa sayfani dı jbırlın u cameydan dımgalwe lathrawotho mşahılfe dıbritho u hawın galwoye.

I egartho di fatıryarxutho kımmo naqla hreto i cito mnasela l’futh a mkone dkıtla dmalıtmo a abneyda ba dukotho dımgalwelın.

Mede ha dkıtyo yasifo du cameydan lı qtıcle i masirutheyde d’bu athro da abohothe, u knofıq moro la qıryawotho la citotho u dayrotho dkito b’Turcabdin.

Mathlo lu medano u camo d’Turcabdin kmacmır a qıryawotho u ksoyım socurwotho kul şato laşan dlo mıqtıc mu athro.

Bi egartho di fatıryarxutho kımmo lı tocina u tacbo dkobe u rişmarcitho Mor Timoteos Şmuel Aktaş dıg nofıq moro la citawotho u dayrotho dkito bi marcitho u la mulkone di dayro d’Mor Gabriyel.

Bu huthomo i egartho ktılbo ma suryoye turcabdinoye dkıtne bu athro u ba athrawotho di golutho dnıfqi moro li marcitho d’Turcabdin. Wi fatıryaxutho kımo kıbcina manxun dı fılhutu camu rişmarcitho d’Turcabdin u dmalxuto l’futh u mede dhiye kobıc, u bu şıklano kıbcina dhowutu mıştamcone ele u dhowutu kaşire ba fulhone di marcitho, kımsalina dhowın a burkotho d’Aloho acleyxun .