Mor Awa u Mor Yuhanna da 10 Yaziji simlen qroyto li Ahmad Alşarıc dıknofıq moro la barmothoye kulle d’Suriya, dilonoyith la n’abne daqalilwotho

BRITHO-SURIYA – Bu taro da gedşe mahişone dhawın bu sforyamo d’Suriya, i qadişutho du fatıryarxo d’Antiyuxiya da Rum Malkoye Ortodoksoye Mor Yuhanna da 10 Alyazaji, bi maqırhonutho dhule lu tboco froso, mawdacle dıqtil u mçarıh menyono celoyo d’mdinoye u haylawotho di mşaynutho gawonoyto ba gedşe mahişone dhawın bi fnitho du sforyamo d’Suriya, u mırle “hani dıqtili latne kulle ma haylawotho du rejim catiqo, elo i sagiyuthaththe mdinoye dlatlın htitho u neşe u nacime ne. ğalabe mdinotho u qastrat u qıryawotho mawqıdi a’botaththe, u manhıbi a’lmonaththe. A’fenyotho dmidi nişo la hçome dukotho da Calawiye uda Mşihoye ne”. 

Fatıryarxo Alyazaji mawdacle ste dıqtil ba gedşani menyono celoyo d’Mşihoye dlatlın htitho, wa comure dhın fenyotho çbiri dnıfqi ma botaththe, ubıthır marıs buğre aclaye u qtili, ubıthır mu qatlaththe ste manhıbi a’botaththe, a’mulkonaththe wa radoyothaththe xdu mede dhawi bi şawtho d’Allıqsur bi mditho dı Banias. I qadişuthayde grışle ste u zuhoro cala surotho d’Yuldath Aloho Meryam dıkmiyaqro ma Maşılmone kulle, kmidoşi u kmitahırwi. 

Fatıryarxo Alyazaji bi egarthayde lu rişqutno d’Suriya Ahmad Alşarıc mırle “hano latyo u mamlathxu wa gunhani dıkmisomi lıkşowın li hzayto dkıtxun laf Suriya i hathto bıthır mi zoxutho du qawmo. Mawxa ksayminalxu qroyto dmakletu a’qtolcamani. Baroyo maklayunne, uhawu reğşo di mşaynutho udi şalyutho la n’abne d’Suriya ba mathhabaththe kulle”. 

Camgabıdathe, i qadişutho du fatıryarxo di cito d’Madınho d’Othuroye Mor Awa Tlithoyo Roel, bi egartho dıfrısle flığle cama fatıryarxe da citotho du camaydan d’Suriya i klayto dmahwewolın bu buyono mşawtfo dıfrıswo 8 bu yarhano, u sımle qroyto la n’abne du camo d’Suriya kulle dfayşi masre bu darbo du diyalog udu şbuqyo athronoyo, udhowın rahuqe mu mantıq di fıtne udu myodo du hayf. Mor Awa bi egartho dıfrısle athmıl, sımle qroyto li şultonutho dı Darımsuq dfılho laşan dmiqafe şroye mşayne dıknıfqi moro lu neshono da barmothoye d’Suriya dilonoyith la n’abne da qalilwotho.