Mor Diyosqoros Benyamen Ataş u Mor Diyonosios Cisa Gurbuz sımlın socurutho lu Vatikan u laqın u Papa Mor Leo dan XIV

VATIKAN – Lfuth i mawdconutho dmatilan, u efetrufo fatıryarxoyo di marcitho du Swed hasyo Mor Diyosqoros Benyamen Ataş u Mor Diyonosios Cisa Gurbuz-u efetrufo fatıryarxoyo di marcitho d’Swisra u Austoria di cito Suryoyto Orthodoksoyto, sımlın socurutho li cito Qatholiqoyto bu Vatikan.

A 2 hsayo mşadri xıd mathlone di cito Suryoyto Orthodoksoyto lu Vatikan calu talab dhawile i qadişutho du fatıryarxo Mor İğnatiyos Afrem II. Bi socuruthathe a 2 hsayo dmıstaqbıli mu Papa Mor Leo dan XIV, maslamlın li qadişuthayde mgalyun  mqadşo kthiwo bu leşono kthobonoyo u dsimo i fothayde bi ido ban arcotho mqadşe d’Urışlem.

Camgabe du Mgalyun mqadşo, a 2 hsayo mcalayo maslamlın’ste egartho lu Papa dıkmadilo calu makthabzabno catiqo di cito ulu yuqrobo dkobo lu huyodo ulu şuşoto di tawditho Mşihoyto-dilonoyith beyn di cito d’Antiyoxia udi cito d’Roma. Mahke’ste cala lqoyotho dhawın bu dacbar beyn da fatıryarxe di cito Suryoyto udu Papa’iye d’meqım.

Awkith i lqoyto dhawyo’wa ban 1971 beyn Mor Paulus da VI cami qadişutho du fatıryarxo Mor İğnatiyos Jacob III. Ban 1983 beyn du Papa Mor Yuhanun Paulus II cami qadişutho d’Mor İğnatiyos Zakay beth Ciwas wi tlothoyto’ste dhawyo’wa ba 2015 beyn du Papa Mor Fransis qadmoyo udi qadişutho d’Mor İğnatiyos Afrem II.