20/03/2020

Mor Timathewos Şmuel Aktaş mawdacle dmaklelın aslawotho a qerowe wa cazat

U rişono di marcitho d’Turabdin Mor Timathewos Şmuel Aktaş frısle mawdconutho li marcitho bi sbutho du kewo di Corona.

 İ mcalyutho d’Mor Timathewos bi mawdconutheyde komır; metul du kewo di Corona hawi qento la haye di noşutho, mawxa ahnaste bi marcitheydan maklelan a qurobe alohoye wa slawotho dıklotım u camo lıhdode.

 İ mcalyutho d’Mor Tematheos Şmuel Aktaş bi maqırhonutho dfrısle bi dafo du nawlo di dayro d’Mor Gabriel, kmawdıc dmaklelın aslawotho, a qerowe wa cazat dkıtne camoye kulle, hol dmitahwe mawdconutho hathto bi sbuthathe. Be bzabno i mcalyuthayde komır; isbuthathe dıkmathro cala haye di noşutho kula, mawxa a dayre wa citotho gıdmısxori la socure.

Megabo hreno a tarte marcyotho di cito Suryoyto Orthoduksoyo du Swed u Skandinavia mıdlın fusqono bıthır me yawme d’Huşabo dkıtyo 22 bu yarhano, a citotho wa salone kulle gıdmisxori hol dmitahwe mawdconutho hathto.

Bi mawdconutho dmıdlan mi mcalyutho d’Mor Diyosqoros Benyamen Ataş mawdacle, d’yawme d’huşabo gıdmisim u yawmo du suboro d’Yoldath Aloho dıknofıl 25 bu yarhano yawme d’Arbco dothe. İ celtho da tarte marcyotho matın lhawxa fusqono, leşan u kewano d’Corona dlo mibarbıs u bıthır a citotho dmitahti bi karanten.

A tarte marcyotho drışlın i sbuthathe me qariwo u mıdlın u hulmono du camo qumi cayno, mawxa matın lu fusqonano bıthır me yawme d’Huşabo lıkowe slawotho u Qurobe Alohoye dıglotım ebeye u camo.