Mqafe slibo catiqo di Cito d’Madinho b’Abu Dhabi 

GZIRTO SIR BANI YAS, Abu Dhabi — Lfuth dafo da İmarat Caraboye Mhayde, ba hfaryotho dsımlın an arkeolog di arişkoyto Abu Dhabi bi gzırto d’Sir Bani Yas, mqafelın luho dkito acla slibo catiqo. U slibano dıkmitıftakır dkıtyo mu doro da 7 aw da 8, kıdome lğer slibe catiqe dımqafın bu Cıraq ubu Kuwait u kit dhowelın asirutho bi cito d’Madınho.

An arkeolog dımşarewolın ba fulhonani bu yarho d’Konun u haroyo dşafıcina, hawın a hfaryotho qamoye bıthır d’30 eşne. Bu zabnanowe’ste, dımqafewo cito u dayro da dayroye. Kmisım taxmin, dkıtne me cayni zabno da citotho u dayre dımqafın b’Umm Al Quwain, bu Kuwait, bu İran ubi Scudiye.

Mşalo du ğrob dan arkeolog mırle; U slibano da Mşihoye dımqafe bi gzırtathe, kıxolıq reğşo du şubhoro udu neshono ebayna leşan dımdawmina ba fulhonani u dımhafdina i yortuthaydan. An atharani zıttır kımacmıqilan camu dacbaraydan u gıdm’athri cala çilat dothe u gıdxulqi ruho di hdoyutho udu iqoro bıgawe du kenşo.

İ Mşihoyutho mbarbızo’wa bu qlimano da Caraboye bu doro dbeyn dan 4 udan 6 elo bıthır, cal dxalyowa i dayrathe d’Sir Bani Yas, madcafwola i tawditho Mşihoyto ban athrawothani. Bıthır mu hethotho dsim bi cito ubi dayrathe dımqafanwo ban 1992, ftihi la socure.