Mşadır egrotho da tahınyotho lı dayroyo Samuel Özdemir

A hsayo di cito Suryoyto ortodoksoyto, ban egrotho dımşadarlın mhanelın abuna dayroyo Samuel calu dcoreyde li cito Suryoyto ortodoksoyto.

 Ban egrotho dımşadarlın ahsayo, mahwelın i fsihuthaththe cali dawsathe dımhalaqle abuna dayroyo Samuel Özdemir.

Bıthır mi egartho dımşadarwole u hasyo di marcitho d’Turabdin Mor Timotheos Shmuel Aktaş, ucdostene ahsayo mcalayo hırene dkudci l’Abuna dayroyo Samuel me qariwo u dhawilın esore acme, kthuwalle egrotho da tahınyotho.

Ban egrotho dımşadarlın a hsayo, kmawdıci i fsihuthathe calu dcoro du dayroyo li cito Suryoyto iemeyde. Bi egartho dımşadarle i mcalyutho du hasyo dı Stanbıl Mor Filiksinos Yusuf Çetin komır:

“Fsihuthoyo li citeydan i Suryoyto kula, bıthır me 50 eşne ducrıt u xıdmatla. Hatheste hawyo bi hubo dkıtlox li cito Suryoyto ubi asirutho qwitho dkıtwolox camu mnohnafşo tlithoy tube mor Yuliyos Yeşuc Çiçek u mor Diosqoros Benyamin Ataş. Kımhaninalox bışme di marcitho dı Stanbıl, Anqura u İzmir calu dcorano didox wıktulbinalox teşmeşto mqabalto bu madebho di cito.”

Hasyo Benyamin Ataşstene bi egartheyde dımşadrole lu dayroyo komır:

“Abuna, kodacno u jahdeydox, a fulhone dıksaymıt bşıkılat mşahılfe bu haqlo di tawditho udi umtho Suryoyto. Mawxastene bıfıshutho komarno, brix mathyox lu bayteydox u catiqo. Hawo da nahrawotho wa şalqat walaw dmohın ebeste lıknofıl. Uhawo u zabno da hayeydox kulle flıhlox u cwıdlox leşane udıkcoyaşwo blebox. Kmawdeno l’Aloho dmatino dhozeno uyawmano u dhawili sahmo nacimo bu dcorano didox li cito wıdhodarno i metaserhonutho da tıre qaşişeydox.”

Mor Filoksinos Saliba Özmen uhasyo d’Mırdestene bu hunoyeyde komır:

“U dcoreydan wu teqbileydox u qliros di cito Suryoyto, kothe ma renye uma ftakare dıktucnıt wi taşcitho da haye dcayişıt bi cito mbaraxto dı Mşiho. Wıdlo şak, i fsihutho dkıtlan; u jahd dımjahadlox dılo kloyo leşan u dcorano didox wu teqbilo di mdabronutho hakımto di qadişutho du fateryarxeydan moran mor iğnatiyos Afrem trayono.”

Hasyo hreno dımhanele abuna Samuel, i mcalyutho du hasyo mor Polikarpus Augin Aydin uhasyo di marcitho d’Hollandawe. Hasyo Augin bi egartheyde komır:

“Kothawno li myatrutheydox i egartheydi, leşan dmahweno u goleno i fsihutheydi udan abne di marcitheydi. Udilonoyithstene hani dkudcilox, a abne di qritheydox Cırnıs dkothın a şerşeydox mena.”

U hasyo dan esore baroye d’Almanya Mor Yuliyos Hanna Aydinstene bi egratheyde mırle:

“İntırto dkıtwo ebox ubu dcoreydox adyawma kamilo. Fsihina ğalabe bu dcoreydox li cito Suryoyto. Hat qatciyan lo rahiqatwo menan ukulnaqla cameynawox. Ukımhaninalox cala tıre qaşişe hathe dmasırhi li rocitheydox dkıtyo b’Belçika.”

Camgabe da hsayo, menyono rabo dayroye, qaşişe u malfonestene, nafiqi moro lu dayroyo umawdıcale i fsihuthathe. Dilonoyithstene i egartho drabmalfone İsa Gares mi dayro d’Mor Gabriel kşuwyo lu iqoro. Bi egartheyde Rabmalfone İsa Gares dıkmawdıc cali socurutho dsımwole li dayreyde ucali fsihutheyde bu dcoro du dayroyo komır:

“Sbisoyith khozeno wıkşomacno la taherzotho mşahılfe dıksaymıt ba frosayhezwe Suryoye uşafirene. Bışficutho kobıt umede dkıtlox la shomuceydox. Kobacno dımdawmıt hawxa dhowet şroğo dıkmanhır lkul. Wıkmıfsahno bu ufqo rwiho di Mşihoyutho dkıtlox.”

Abuna dayroyo Samuel walaw dlatweyne bi mdabronutho di cito Suryoyto ortodoksoyto, elo lo maklele i mcadronutho maddi umacnawi wa socurwotheyde la marcyotho, la hsayo, ula citotho. Ukul naqla blebo rwiho ubasimo mıstaqbele u camo wa mhaymıne.