Mşarele u cadcido da rşome b’Caynkawa

ANKAWA / ARBCAILO, Beth Nahrin — Yawme d’Arbıco dşaficina sim u futoho du cadcido du rşomo dımtayıb mi mdabronutho gawonoyto di mardutho udi amnorutho Suryoyto du qlimo d’Kurdistan du Ciraq, bi methcadronutho di gudo d’Şamşa du masırho wu hudro kenşoyo di claymutho d’Caynkawa. U cadcidano dımdawamlın a’hfitwothayde tre yawme, mtayıb ba ganotho du qentrun akadimikoyo kenşoyo bi qastra d’Caynkawa bu garbiyo du Ciraq. 

U cadcidano mşarela i tahraztayde bu mamlo dsımle u mdabrono gawonoyo di dayira di mardutho udi amnorutho Suryoyto Kaldo Remzi Oğanna dmırle “knofıl aclayna adyawma dsaymina u sutoro di fotho şarirto d’Caynkawa, dnıfqina moro lu makthabzabnayda, lu leşonayda, la comurayda, ulu cuhdonayda dıkdocır la cumqe du makthabzabno. Ahna b’kul şubhoro kfıthina adyawma u cadcido qamoyo du rşomo b’Caynkawa xıd zacqa di amnorutho udu mrodo dkımmo: ahna harkena u gıdfayşina”. 

Bu cadcidano, fris menyono celoyo d’surotho du rşomo dımgaşamlın u uslub wi mawhabtho dkıtlın a’raşome dıxlıtlın u şufro wi mdinoyutho cami yortutho marduthoyto u kenşoyto du camaydan. Bu cadcidano ste fris medone du nhoto u rşome bu darbo du tewqido da qayse. U camgabıdathe mqadım şişaltho d’zmoro u musiqi basimto ma hadome du akadimi d’Ornina di amnorutho. 

Lu cadcidano, mıştawtafle mathlone d’şutose ruşmoye u tawdithoye u mathlone hrene d’gabe folitiqoye, uba mowat du camaydan d’Caynkawa.