Mtayıb bi mditho di Hasake ulqoyo emwothoyo da maye

Mtayıb bi mditho di Hasake, u lqoyo emwothoyo da maye du garbiyo udu madınho d’Suriya.

Bu lqoyano dıkmıdroşo ebe i bsirutho da maye dıkmitıstacımlo xıd zayno du qrobo, kmıştawtafle zıd m’300 mşale u mathlone di mdabronutho yothoyto u da tukose noşoye emwothoye u gawoye dıkfılhi ba fenyotho du garbiyo u du madınho d’Suriya.

 Adyawma safrayto mşarelın a’fulhone du lqoyo emwothoyo da maye du garbiyo udu madınho d’Suriya dıkmitaybi bi mditho di Hasake, bi rocyutho di sictho di mdabronutho gawoyto udu kyono du qlimo di Gozarto.

La ytawyotho du lqoyano dgımdawmi tre yawme, kmıştawtıf zıd m’300 farsufe dkımmathli mşale u delegasyone da şutose di mdabronutho yothoyto, şutose du kenşo mdinoyo, tukose noşoye emwothoye dkıtne hfite bu garbiyo ubu madınho d’Suriya u mathlone hrene dı tukose u platforme du huquq udu kyono.

U lqoyano mşarele a’ytawyothayde bu mamlo di sictho mtaybonitho dsim mu rişono zawgoyo di sictho da karxıwotho udu kyono Sleman Carab. Bu mamlayde Carab mawdacle da mdinoywotho qamoye di noşutho mşatsiwo m’alfayo dışne cal sapthıd da tre nahre dı Deqlath udı Froth, u grışle ste u zuhoro cala maye dkıtne u warido asasi da haye udu sistem kenşoyo dıbritho, mawxa ste i bsiruthaththe kmıhşowo hdo ma casqwotho rabe dkulle dıkloqın a’kenşe dıbritho.

Carab mırle ste “i mdabronutho yothoyto klıqyo b’qetre du qento, mi celtho da şuhlofe du muzoğo wu tathiraththe mrimonoyith cala haye ucalu kyono, ubebzabno mi celtho du menyono da bnaynoşo dıkzoyıd umi şalqa rabtho da galwoye gawoye d’Suriya dıkfixi calu garbay madınho d’Suriya. Kito ste qetre hrene dıklıqyolın i mdabronutho yothoyto mfothıd du kboşo Turkoyo wa fulhonayde a’marıhbone dıktorın dhowe casqutho bi mdabronutho ubu tecwido du sistem da şabakat da maye. Mawxa ste i aykanoyutho da maye ba fenyotho du garbiyo udu madınho d’Suriya latyo tawto, cal dkıtyo masırto cami tahrazto folitiqoyto dhın athrawotho dhınnene dıksaymi u duyoqo da mabuce da maye”.

Callathe, Carab mawdacle bu lqoyano kmıdroşi a’mkone dmitaxıf u kriz da maye dıkmitıstacmıl xıd zayno du qrobo, u kıtle u nişo dmıxlıq şıkıl du duzan da maye bi fnitho, dmişalıt bahro cala qyome emwothoye dkito bi sbutho du zedqo da maye, udmıgrış u zuhoro cala siyasat qlimoye ucalu qrobo da maye u aydarbo kmitıstacımli ba krize folitiqoye u momunoye wu tathir mrimono dıktıryo i bsirutho da maye calu kenşo.