Mtayıb hfitutho du Sayfo bi qritho d’Ciwardo

Bi cito dsimiwo a hulhule da neşe wa zayne dobınwo funoye la bcelıdbobe meqım 105 ışne, sim mamle u mahke calu mrodo dhuwo me gabo u me gabo hreno dıtwırwo u nişo du mabco du qşoco du cameydan.

 Athmıl dkıtwe u yawmo şatonoyo du duxrono du Sayfo, a comure d’Ciwardo mathkarlın u Sayfo bi cito d’Mor Had b’Şabo, i cito dhawyowa i qalco dmaxlaswola u cameydan mu qşoco.

 Athmıl a comure di ciwardo latimiwo bi cito d’Mor Hadbşabo laşan dmathkıri a sohde dıbızlın u admathe cali arco mqadaştayo da abohotheydan bi dactho bayncaynaye mşafrolın u trelın dhuyo i arco di mdinoyutho.

Bele bu yawmano dkıtwe u duxrono du sayfo u du mrodo dhiw bi qritho d’Ciwardo Yuhanın Akay mahkele la nacime di qritho mın hawi meqım 105 ışne.

Bu yawmano dhawi mamle u qole u dıqlın u noquşo di qalco dhawyo wa masılsonitho lu cameydan i emo d’Abuna qaşişo Yusuf  Akbulut  Meryem Akbulut mahkele calu sayfo xıd u abreyda mahkewole cal sayfo dlo zoctho.

Bıthır mathe  Xanıme Akayste mahkela xıd athto calu sayfo dhawiwo meqım 105 ışne calu camo Suryoyo. Bi hfituthathe a comure di qritho mahwelın du ağuno dhulın a abohothathe meqım me 105 ışne lo tancıle u gıdmahile la dore dothın.