Mtayıb turgomo calu yowmo du dukhrono d’malfono Naum Faik

Sim udukhrono da 90 eşne dgelyunoro u Malfono Naum Faik.

 U hudro marduthoyo Othuroyo d’Norrköping dımtayable u duxronano, kıtwole tahrazto catırto. A qaşe dhadiri bu duxronano, maqımlın teşmeşto cali ruho du mnoho Naum Faik.

Bu fethghomo mşamho dmırle malfono Naum Faik “Man Lo Yodac leshone, lo yodac lmono ethileth” dkıtyo u sukoleyde i mıcneyde “Man dlıkodıc uleshoneyde, lıkodıc qayo mawlıd”; sim uduxroneyde.

U hudro marduthoyo Othuroyo d’Norrköping dımhadarwole uyawmano athmıl bu benyoneyde, mdabarwo u mqadamwo me Jamil Diyarbekirli. U duxrono dımşarewole cam qatinto dşetqo cala ruhotho da sohde wa umthonoye dıflıhlın leşan i sbutho du cameydan, mahkewole ebe Jamil Diyarbekirli cali olsoyutho du syomo dhawxa duxrone wu nfoqo du moro la umthonoye dıkfılhi leşan u cameydan.

Uduxrono mdawamle bu qroyo dmimro me Sintiya Bıhno, zmirto mu qolo dı myaqarto Elizabet Nison u mimro me omuro Yahkub Şanko cal gelyunoro u malfono Nacum Faik.

U dayfo dilonoyo du yawmano uhawreydan gelyunoro Yawsef Beth Turo we dımqadamle turgomo cala mghalyotho wa syome dmalfono Naum Faik. Dilonoyithstene qrele umahwele kımo ma mimrotheyde la hadire. Beth Turo dmahkelestene bu turgomeyde calu dawro wi mardutho du tboco-froso ba haye du cameydan, huwle mkono la hadire dımşayli a shuwolaththe udobın i hzaytaththe cali munasabe du yawmano.

U turgomo dımşarewole i şoctho ba 15.00 dfalge dyawmo, mdawamwole hol li şoctho da 18.00 dcasriye. Bu duxrono, u mdabrono du hudro marduthoyo Othuroyo d’Norrköping myaqro Said Nison sımle mamlo dımqadamle ebe a tawdiyotheyde la meştawtıfone. Umahkele cali olsoyutho dhawxa duxrone wu taathir dkibın dtorın cala bnaynoşo uhuwle mathlo cal ruhe umadcarle a hadire lmeqım 44 eşne dhadırwo bhawxa duxrono dım’atharwo mene. Calışme di mdabronutho du hudro marduthoyo Othuroyo d’Nörrköping, myaqro Said Nison mqadamle şukono du hudro lu hawreydan Yawsef Beth Turo calu turgomo dımqadamle cal Naum Faik ucalu fulhoneyde bu haqlo di umtho.

Abuna Qaşişo Saliba Malke’ste dsımle mamlo bu turgomano, bi hareyto macızmi a qaşe kulle camıhdode dmaqimi teşmışto cali nafşo d’Naum Faik wa umthonoye hrene. Wa hadire hawiwolın mkono bıthır mu turgomo dmıjğoli camıhdode wıdşotınne qhutho u duxlilın halyutho u fire camıhdode.