Mtayıb u lumodo qamoyo du Mawtbo da Neşe du garbiyo u du madınho d’Suriya

Bi mdito d’Qamışli d’Suriya, mtayıb u lumodo qamoyo du Mawtbo da Neşe du garbiyo udu madınho d’Suriya dımşataswo meqım tarte ışne.

Lu lumodano dsim leşan dmitakso i athto du garbay madınho d’Suriya, mıştawtafla i rişonitho zawgoyto du Mawtbo mşablono du qlimo di Gozarto d’Bethnahrin Nazira Gawriye.

Bu nişo“u qawmo di athto u garanti du kenşo demoqratoyo hiro’yo”, adyawma mşarelın bi mdito d’Qamışli, a fulhone du lumodo qamoyo du Mawtbo da Neşe du garbiyo udu madınho d’Suriya dşafıc hani tarte eşne cali mşatsonuthayde.

Lu lumodano mıştawtafle mathlone d’gabe folitiqoye du qlimo; beynothaye i rişonitho zawgoyto du gabo du Huyodo Suryoyo Nazira Gawriye, u mathlone hrene du Mawtbo d’Suriya Demoqratoyto, di Mdabronutho yothoyto du garbiyo udu madınho d’Suriya, uda hayle di mşaynutho gawoyto da neşe.

Bıthır ma mamle du futoho dsimi ba 3 leşone Suryoyo, Caraboyo u Kurdoyo, mqadım’ste mamle hrene bışme di sdirutho du Mawtbo da Neşe du garbiyo udu madınho d’Suriya, bışme d’MSD wi Mdabronutho yothoyto wu Mawtbo da yaqrotho da Sohde.

A malole makadlın di wolitho rabtho dıknuflo calu Mawtbe da Neşe, dnofıq moro la yuthrone dımhaqıqi bu garbay madınho d’Suriya, u mawdaclın di athto klozım dhowela dawro m’athrono bu tuyobo du nomuso esonoyo hatho d’Suriya. Be bzabno, sım qroyto lu kenşo Emwothoyo dımqafe şroyo lu kriz folitiqoyo d’Suriya, dilonoyith lu cnufyo ula siyasat cjiqe dıkmisomi cali athto ba fenyotho kbişe d’Suriya.

Bıthır ma mamle dsimi, qre u driş u taşroro dcala fulhone dsımle u Mawtbo da Neşe ba 2 ışne dşaficina, u driş u nomuso gawoyo. Ubu huthomo du lumodo mid fusqone cali mtaksonutho di athto dıkcayşo bu garbay madınho d’Suriya. Bu lumodano, hiw’ste şukone du iqoro lu şutoso du Mawtbo da yaqrotho da Sohde, ulu şutoso da mçarhe du qrobo.