Mtayıb workşop cali yortutho u calan athare di daşto d’Ninwe

A nahire wa yadıcthone du Iraq bu haqlo du huquq, mahwelın u hfuxyathe mqabıl da fulhone du tehriwo du şuro makthabzabnoyo d’Ninwe.

Camgabıdathe, mtayıb workşop dımdawamle hamşo yawme cali yortutho ucalan athare di daşto d’Ninwe, baynothaye u şuro d’Ninwe.

Athmıl u qoyumo catiqo du camaydan bu parlamento du Iraq Josef Sliwa wu rişono du gabo du Huyodo d’Bethnahrin Athroyo Yusıf Yahqub Matti, bi socurutho dsımlın lu şuro makthabzabnoyo d’Ninwe, qtırwolın knuşyo lu tboco froso u mahwewolın u hfuxyathe mqabıl du tehriwo du şuro d’Ninwe bi mıştawtfonutho d’menyono celoyo d’şutose du tbocofroso du Iraq. Lu knuşyano mıştawtafwoleste u mşawrono qonunoyo Ğanem Sadiq Alhadidi.

Bu mamlo dsımle Alhadidi mırle; i şrorutho qrihtoyo. U şurano kıtle bu yurxayde arco dıkmitahrım dmisım eba fulhone u tarmiyotho yaste dmistısacımlo l’mede. İ yarcathe mbaynowa ban 1971 b’ruhqo d’120 metrowiye mu şuro, manqıso’ste l’50 metrowiye, ubıthırste manqıso 20 metrowiye mu şuro d’Ninwe. Ucdo a fulhone du grofo udu shofo da kefe xıd khozitu masrene baroyo bu şuro. İ sbutho latyo a kefe, elo i mdinoyutho d’umtho yo.

Ba yawme dşaficina, u qoyumo Josef Sliwa bi egartho dımşadrowole lu rişwazire Mustafa Alkadhimi ulu waziro di mardutho uda athare mawdacwole dıkmisım gunho cjiqo calu makthabzabno du Iraq u b’şıkıl ftiho qum d’caynothe di şultonutho gawoyto di hiğmonutho d’Ninwe. Sliwa bi egarthayde tlıbwole mi şultonutho d’Boğdod dmahto klayto qşitho mqabıl da fulhone du tehriwo du şuro d’Ninwe, u makadwole d’noşo latle u zedqo d’sohıf u şuro makthabzabnoyo walaw ste dhowele ithbate qonunoye dkıtyo morıe di yarco dıbne u şuro d’Ninwe.

Camgabıdathe, i Mtakasto İtaloyto d’UPP ubu taro di tarmitho d’camıhdode lu şlomo, mtayabla bi mditho d’Namrud workshop cali yortutho ucala athare di daşto d’Ninwe. U workshopano dımdawamle me 15 uhol 21 bu yarhano, bu yawmo haroyo a mıştawtfone makırxi a benyone makthabzabnoye di mdito catıqto. Beyn da athare dhiw mawdconutho aclaye, kıtwo u şuro d’Ninwe, u qusro du malko Sanharib wu qusro du malko Sargon, i mdito d’Namrud, u qusro du malko Salamnasır III’yo, a tawre gefonoye u ğer. U workşopano mtayıb bnişo dmitahwe mawdconutho li claymutho di daşto d’Ninwe cala athare u nuqazyotho makthabzabnoye di mdiho Othuroyto d’Ninwe.