23/03/2021

Rişono Joe Biden adşato kibe dmawde bu qtolğenso da 1915

‘U rişono d’Amerika Joe Biden, gıdmawde bu qtolğenso dsımwola i mamlaxtho da Cuthmanoye cala came Mşihoye bi şato dan 1915’ a melani di dafo d’J-Zero Mediane.

 U rişono du ğrobano di Media mırla; Matili xabro mu Qusro Heworo, du                                                  calan Armınoye, Suryoye Othuroye u Pontusoye.

İ dafo digital d’GZERO Media dkıtyo u qentrunayda b’New York d’Amerika, frısla tebo cali kampanya dmabdewole u senator Bob Menedez leşan i mawdyonutho bu qtolğenso dsımwola i mamlaxtho da Cuthmanoye cala Mşihoye dıkhoyanwo ba thumayda. U rişono di dafathe İan Bremer dkıtyo kathowo dıkmahıt u yuqrayde cali siyase global u mşatsono d’Eurasia Group dkıtyo şırke da buhone, huwle maqırhonutho bi sbuthathe

Bremer adyawma mawdacle, du rişono Joe Biden gıdmawde adşato bu qtolğenso dsim calan Armınoye, Suryoye Othuroye u Pontusoye bi şato dan 1915. Bremer mırle; Şamıcno mu Qusro Heworo, du rişono Biden gıdmawde da hawbe dsımwola i mamlaxtho da Cuthmanoye ban 1915, dkıtne qtolğenso. En dothe Biden dmawde bu qtolğensano, gıdhowe u rişono Amerikoyo qamoyo dıkmıctarıf bu Sayfo dan 1915.

Bremer mawdacle’ste, d’Biden huwole şudoyo bi kampanyayde dgımawde bu qtolğenso wi mcadronithayde-Kamala Harris’ste hdo ma sponsore dhawyo celtho du senato dmoyıd fusqono ba 2019, leşan i mawdyonutho du qtolğensano. Bu tebano d’GZERO Media, mahke’ste dhol 40 senatore-bi rişonuthathe Bob Menendez mabdelın inisyativ u tlıblın me Biden, ruşmoyith dmawde bu qtolğenso u dfolıh leşan naqla hreto dlo mikarıri a hawbani.

U mede dıkgorış u zuhoro calu inisyativano dmabdele Menedez, bi egarthathe dımqadamle lu rişono Biden, dıkmitathkır-camgabe du qtolğenso dsim calan Armınoye-u Sayfo dsim calu camaydan u Suryoyo Othuroyo u Pontusoyoste.