MUB frisle buyono bi cohnutho du cedo di qaymto: Mşiho bu nuhomayde maglele cala mafhume di xyene, di lo haymonutho, du fuloğo udu sistem di gracyutho, u hıkmile

Frısle u Mawtbo Umthoyo d’Bethnahrin buyono bi cohnutho du cedo di qaymto. Bu buyonano dfrısla i Sictho di Rişonutho d’MUB kımmo; Mşiho bu nuhomayde maglele cala mafhume di xyene, di lo haymonutho, du fuloğo udu sistem di gracyutho, u hıkmile.

Bi cohnutho du cedo di qyamto du camaydan dgımcayıd ramhıl u nuhomo d’Moran Yeşuc Mşiho mu qabro, u Mawtbo Umthoyo d’Bethnahrin frısle buyono leşan dımcayıd u camaydan dıkhoye bu athro uban athrawotho frişe di golutho. Bu şuroyo i Sictho di Rişonutho d’MUB kımmo; Kımcaydina u cedo di qyamto du mashab Orthodoksoyo du camaydan uda Mşihoye dbritho kula. İ cito Suryoyto d’Antiyoxiya dımşatso bi rişonutho d’Fawlus u Şliho, mıştacela dawro mbaynono bu yulfono di Mşihoyutho ubi mbaşronuthayda.

Mawdıci a cede du mawlodo udu quyomo d’Mşiho l’britho kula uba mo mılyune dıbnaynoşo mtaksi hedor i falsafe di haymonuthathe, u hathe hawyo celtho dmişawşıto mardutho kenşoyto di methcadronutho. Bu halxo di hubo, du iqoro, di kinutho udu floğo dmabdele Mşiho b’Urışlem, sımle qroyto li noşutho kula dothın lu şlomo. İ qroytathe dsimo meqım 2000 eşne, adyawmaste knufqo xıd sniqutho asasi, cal da taxtuşe udu cnufyo kımdawmi beyn di noşutho. A floğe da mashabe wa grube dhawi bgawe di Mşihoyutho, kmicoşi bşıkıl qaşyo beyn du camaydanste.

MUB mırle; Kull 4 eşne, a mashabe kulle kımcaydi u cedo di qyamto camhıdode elo ba ışne hrene-ahna xıd camo, u cedano dkıtle cayni mıcne kımcaydinale frişo, u cayşina i bsirutho du medano. Bu sebyono mşawtıfo da citothaydan uda rişone tawdithoye dkıtne cayıd d’mashabe frişe, dımcaydi a cede du mawlodo udu quyomo d’Mşiho bcayni yawme, gıdmaclın u moral kenşoyo u gıdmaqwın i methcadronutho zıttır. U mawlodo d’Mşiho hawi u sabro di haymonutho hathto udu xalas, u quyomaydeste mantele u sebyono du dalqublo wa darbone du ağuno mqabıl di bişutho, di cıtmo uda dolume.

MUB komır; Bi cohnutho du cedano ksaymina qroyto lu camaydan, li hdoyutho, ulu snodo du ağuno umthoyo dıkmitahwe bi rişonutho du Mawtbo Umthoyo d’Bethnahrin u dmitaksi hedor i dacwa umthoyto, b’nişo dmaqımina a tahlukat du doro dcayşina. Cal da cedaydan a tawdithoye u umthoye kobın amro la falqe du camaydan kulle dnufqi moro lu athro ula timoyothathe. Calathe leşan dmawfıqina droşe mu makthabzabno u dımcaydina a cedaydan bu athraydan Bethnahrin b’hirutho, klozım dmamtena li duktho a wolyothaydan. Bu asasano bi qamayto kımcaydina u cedo di Qyamto da falqe du camaydan kulle dkıtne masre bu mashab Orthodoksoyo, da rişone tawdithoyeydan, da yaqaryothaydan da Sohde udu cılmo Mşihoyo kule. Ubu yawmano du cedano u mqadşo, ktılbina lu athraydan ulu camaydan dactih mşayno u hiro.