18/06/2020

Qoyumo Çelik sımle mamlo cala qatle lo idice dhawın b’Turkiya

U qoyumo du cameydan bu parlamento d’Turkiya kımdawım dıgorış u zuhoro cala zedqe du cameydan ba mamle dıksoyım bu parlamento du athro.

 Bu mamlo dsımle athmıl bi ytawto dhawyo bu parlemento, mamtele lbole d’Turkiya a farsufe du cameydan dıqtili ba tmoniyat, dheş layto idactho calu qatlathe.

U qoyumo du cameydan Tuma Çelik bu mamlo dsımwole bu parlemento mahkele b’rwihutho cali ayakanoyutho du cameydan u kali calu qatlo dhawi ba tmoniyat tahtu ışmo da qatole latne idice.

Çelik bu mamleyde mırle; A qatlani dhawıın dıqtil farsufe mşahılfe du cameydan u heş hulucdo layto idico man qtile a farsufani, mawxaste u malxano dıksayminale ahna xıd gabo demoqratoyo da came mqabıl da qatlanık u dkımdawmi ucdo, di şıltonutho kıbco suxro feme da came elo klozım di şıltonutho dıdco ahna lıgkolina mu ağuneydan da came.

Bu  mamleyde sımle sturyo işıltonutho u mırle xıd diktatoriye xdu zabno d’Kenan Evren dımsıkwole a mnaqye du camo ucdoste cayni mede ksaymutu, u hathe simalxu meqım mqabıl du cameydan u mnaqyo Şıkri Tutuş qtil ba qatle dmahatxın ışmaye a qatole latne idice.

U qoyumo du cameydan dsımle 4 qatinotho d’mamlo frişowele lu qatlo da farsufe dı qtili mu cameydan u matele u mamlo li sbutho di iqartho d’Be Diril u mırle I şıultonutho lo ksaymi u cuqobe u lo kımşaylo cali sbutho xıd sımla ba sıbwotho da qatle hrene du cameydan.