MUB frısle egartho d’buyoe calu şenoyo d’Şamcun Tok Beth Haddo

U Mawtbo Umthoyo d’Bethnahrin-MUB, frısle egartho d’buyoe li iqartho d’Şamcun Tok Beth Haddo.

 İ sictho di rişonutho du Mawtbo Umthoyo d’Bethnahrin kımmo; ktulbina sabro la yaqrotho d’Beth Haddo u Budak u kımqadminalın a buyoeydan.

Bi egartho da buyoe dıfrısla i Sictho di rişonutho du Mawtbo Umthoyo d’Bethnahrin-MUB ba melani kımşaryo; U babo da hadome di sictho Mdabronitho du Mawtbo Umthoyo d’Bethnahrin Merame Budak u Samo Tok Beth Haddo myaqro Şamcun Tok Beth Haddo bu siqumo d’28.08.2020 nqil ma hayani a zabnoye bi mditho d’Giessen d’Almanya b’cımro d’84 eşne.

MUB komır; İ iqartho d’Nure u Şamcun Tok Beth Haddo, hawilın tacbo rabo bi sbutho dmınyono ma farsufe da yaqrotho d’Beth Haddo u Budak dmıde duktho bgawıd du ağuno di hirutho umthoyto du camaydan. Ktılbina rişo basimo la eqaryothani amothonoye, u kfılğina u haşathe acmaye.

Bu huthomo MUB mırle; u duşno rabo dı brithoyo d’emo u babo dhowelın şubhoro dımrabelın nacime dkıtne masre bi sbutho du camathe u du athrathe. A nacime wa nubğe d’mnoho Şamcun Beth Haddo hulın şubhoro li emathe u lu babathe ba wolyotho dmıdde cal ruhaye bu ağuno du camaydan. Bu heqoqo di lhiqutho du dcoro du camaydan lu athro, dımbarbız lı britho kula bnetije dı trajedi knofıl wolyotho cal kul mothonoyo.

Cal ışme di sictho di rişonutho du Mawtbo Umthoyo d’Bethnahrin MUB ktılbina sabro la yaqrotho d’Beth Haddo u Budak u kımqadminalın a buyoeydan. Ktılbina husoyo lu mnoho Şamcun Beth Haddo u kımmina dukthe huyo i malkutho şmayonitho.