Merkel mahıtla klayto qşitho mqabıl Turkiya

Bi sbutho di mwatyutho dkito beyn du Yawnan u d’Turkiya, i rişathwazire d’Almanya Angela Merkel ğalabe qriho mbayanla iklayto dkıtla u mırla; Ahna bi sbuthathe gıdsundina u Yawnan en dhowe mede.

 Bu mamlayda Merkel mırlaste; lo belhude Almanya elo anathrawotho d’Urifi kulle kıtlın i mşaluthathe leşan u athro du Yawnan.

 Bıthır mi socurutho dsımwole u waziro di baroyutho d’Almanya Heiko Maas lu Yawnan u l’Turkiya, i rişathwazire Angela Merkelste sımla mamlo bu telefon camu rişqutno d’Turkiya Recep Tayip Erdoğan u drişowa isbutho du qetro du yamo Mescoyo u du Yawnan, dkıtyo athro hadomo du Huyodo d’Urifi.

Bıthır ma zawcan,, u mu mahwo şqolano, i rişathwazire Merkel maqrahla ğalabe ftiho, dhınne xıd Urifi gıdsundi u Yawnan mqabıl d’Turkiya. İdicoyo d’Almanya u Turkiya kıtlın esore catiqe camhıdode dıkmote u zabnathe l’meqım mu Sayfo dan 1915. Ucdo kmahwe d’Almanya gdımhalxo lfuth iklayto dkıtla Fransa mqabıl d’Turkiya metul ba yawmotho d’şaficina, Almanya sımwola qrayto l’Turkiya u lu Yawnan dıgurşi asfinothathe mu yamo xıd hedriye lıqrobo.

Me gabo hreno an athrawotho du Huyodo d’Urifiste huwlın mawdaclın ihzaytathe bi sbutho du fsoso di socurutho da barmothoye du Huyodo d’Urifi l’Turkiya. Mawdıc d’Urifi mawraxla u zabno l’zabno dlatyo mtahmo awkith a barmothoye du Huyodo d’Urifi lıkowe dsaymi socurutho lu athro d’Turkiya.

Metul du kewo di Corona, dlayto kontrol acle u Turkiya kmıhzoyo xıd qento li socurutho. İ maqırhonuthathe di rişathwazire d’Almanya mqabıl d’Turkiya kmifaşqo, dbıthır me zabno yarixo a esore beyn d’Almanya u d’Turkiya cabiri bı darbo di  mwatyutho.