MUB frısle egartho towdiyotho la mcadrone lu ağuno Umthonoyo

Bu buyono dıfrısle u Mawtbo Umthoyo d’Bethnahrin-MUB komır „ u ağuno di hirutho dkobinale mu yawmo qadmoyo bu snodo maddi u macnawi du camaydan fayış cali rağlo, u mhalaxle la nişe dmahıtle bqamuthe u yaruw.

MUB bu buyonayde kımqadım tawdyotho lu bınyonayde u mtakso, la hadomeyde, la noqufeyde u lu camo mothonoyo dmahwelın snodo bi lamme di şato.

U buyono dıfris mi sictho di rişonutho du Mawtbo Umthoyo d’Bethnahrin-MUB kmawdıc, ha ma fulhone ulsoye du ağuno i lamme di şatoyo cal dkıtla dawro mbaynono bu tenhito la haye a tahrazyotho folitiqoye, tukosoye, folhoye.  I Lamme şatonoyto d’MUB kul şato kımşaryo bu yarho da 10, u kmikamlo bgawıd dıkmo yarhe. Bu zabnano kmisım fulhono hfito, u kmimıd u snodo momunoyo du camaydan u mothoyo, da sanode u da noqufaydan.

MUB ba melani kımdawım, A şuşote haroye kmitawdıci lkul farsufo u eqartho dıkmımtelın. Bi Lamme da 2020 mid lquli cayno a şartat du kewo di korona, u mşare li Lamme bu şuroyo du yarho Teşrin u Haroyo. I Lammathe simo bu fulhono du bınyonaydan d’Urifi,  wa wahde hreneste lfuth da mkonaththe mahwelın snodo. B’Urifi, Amerika, Awustralya, Turkiya, Suriya, Lebnon u bu Iraq ba olufe eqaryotho mothonoye mahwelın snodo li Lammeydan. Bgawıd dhawxa maşıqle casqe, dmisım harake dılo mıtcın a wolyotho umthonoye, u ağunaydan naqla hreto mahwele u fusqono kamile dkıtle, u mthabatle i şrolutho dlıgıdtore mi dacwayde di hirutho du camaydan. Kul  mothonoyo ayko dı britho dhowe tır dhowe, dıkşofıc li harake leşan dmanhıt la haye a wolyothayde a mothonoye, dıkımmathıl i hiyoyuthayde, kobe sabro leşan di zoxutho u di hirutho.

Kul mothonoyo dıkmoyıd dıktho ba hfitwotho uba fulhone umthonoye u kenşoye dıkmisomi mu ağunaydan, kobe nıshono u moral lu camaydan. A sohdeydan bi lbibuthaththe bi casaraththe fdelın a hayaththe lu camaydan, u mahwelın u darbo dıklozım dmihalıx buwe. Bu asasano u ağuno umthonoyo dıkbena kıtle olsoyutho dıklozım kul naqla dmitacış u dmişawşıt. U ağuno umthoyo u kenşoyo, wi hirutho dlo şak ktılbo badale. Calathe kul farsufo du camaydan knofıl wolitho dıgıdlozım dmantela li duktho. Leşan du ağunaydan dmote li zoxutho, kul naqla gıdımdawmo i sniqutho du snodo du camaydan. Bu asasano lo ba alfowat elo ba mo alfowat eqrotho mothonoye, ba malyune d’farsufe dmamtın li duktho a wolyotho dkıtte bi zoxutho umthoyto du camayda, gıdhowın haylo rabtır, ubu şıkılano gıdwena haylo rabo u gıdmihalıq kul yawmo dawse hreto  lu qerowo la nişe dkıtlan.

Bu asasano, ksaymina qroyto lu camaydan u mothoyo, kul naqla dnıfqi moro lu ağunaydan u umthonoyo maddi u macnawi u d‘mawrıwile, b’sabro dımtena l‘dactith b’nıshono. Kımqadmina tawdyotho la hawronaydan kulle ba mkone du izolasyon du kewo di korona udu pandami dsımme fulhono, dmahwelın snodo, u kımqadmina tawdyotho lu camaydan u mothoyo ula rohmaydan,  u ktılbina ba hayaththe kuşore rabe.