28/04/2021

MUB mahanele Joe Biden dmıctarafle bu qtolğenso dan 1915

Bu buyono dfrısle u Mawtbo Umthoyo d’Bethnahrin, drıle a şlomayde lu rişono Amerikoyo Joe Biden cali mawdyonuthayde bu qtolğenso dan 1915.

Bu buyonano i Sictho di Rişonutho d’MUB kımmo; U rişono Amerikoyo mahwele i klaytayde li şultonutho d’AKP- MHP, en dothe dubci dsaymi qtolğenso hatho u tendifo etnikoyo u tawdithoyo, lıkfayşi dlo çaza.

U buyono dfrısle adyawma u Mawtbo Umthoyo d’Bethnahrin mahkele calu Safyo dsımwo beyn dan 1914 uhol 1924 calu camaydan, calan Armınoye u Pontusoye mi mamlaxtho Cuthmanoyto udu qtolğensano hawi u qaşyo dkulle bu makthabzabno di noşutho u Turkiya’ste hani 106 eşne kımdawmo dmankırole. Bi siyase cçıqto dmaşela Turkiya, mnasela bkull darbone dmahto mnoco qum athrawotho dlo mawdın bu qtolğenso-dbıthır mene’ste lo qdir dmıkle qum du tuyobathe b’britho.

Elo u vujdan di noşutho, wa athrawotho dkıtlın u mafhum doronoyo u dıkmdafci a zedqe noşoye wi kinutho, lo fayişi şalye mqabıl di şrorutho u mawdelın bu qtolğensano uba fusqone dmıde ba parlamentowiyathe maqbelın dsim qolğenso. Bi maqırhonutho du rişono Amerikoyo Joe Biden 24 bu yarhano mawdele bu qtolğenso dan 1915, hathe huwla perspektif hatho cal mawdıyonutho ba qtolğense du dacbar wu krohathe ulsoyoyo leşan dmıkle qum  da hayle dıkımtaybi a hawbano.

MUB komır; U rişono d’Amerika Joe Biden mahwele i klaytayde li şultonutho d’AKP u MHP, en dothe dsaymi qtolğenso hatho du qşoco etnikoyo u tawdithoyo-lıkfayşi dlo msombrişo. İ ntırtaydan xıd Mawtbo Umthoyo d’Bethnahrin u xıd camo i kinutho emwothoyto dholocdo dişo u dsimo qurbono la yuthrone dğer’yo. U talabaydan bu şuroyo mu rişono Joe Biden u bıthır ma rişone hrene kulle, du qtolğenso da Suryoye dmitıjğıl acle u dmitawde ebe’yo. U camaydan mamte lqum qşoco ubı Turkiya naqıs lba casro alfayo mcal fothe di tuhmonoyutho dkito wa came kfayşi jbiroye dtolın i hiyoyuthathe.

Bu huthomo MUB mırle; B’Turkiya leşan dmitawde bi şrorutho, u dmişakıl sistem demoqratoyo ubu xloqo du sistemano kibın a came bu şlomo ubi hirutho dmıtyaqni lıhdode u dmitanihi a jurhathe. Calathe xıd aydarbo u ağuno demoqratiqoyo dkobın a came b’Turkiya kıtle ulsoyutho u snodo Emwothoyoste ulsoyo’yo. İnaqla dmitahıt tedbire cali zıhniyathe du qtolğenso, u maşıqlo di demoqratoyutho gıdmisarhıb, u gıdmıftıh warqo hathto beyn da came. Bu asasano kımhanena u rişono d’Amerika Joe Biden cal dmawdele bu Sayfo, u ktulbina mene dmahwe snodo li dacwa du camaydan uda came dişe dmafiti mu qtolğenso.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…