MUB sımle u konferanseyde di şato

U mawtbo Umthoyo d’Bethnahrin-MUB sımle u konferans şatonoyo da fulhone dkıtle cal darbo du nawlo dmıştawtafle a hadome di mdabronutho  du mawtbo umthoyo d’Bethnahrin.

Bu buyono du huthomo dıfrısle MUB ksoyım qrayto li hdoyutho umthoyto dmitahwe ağuno qawyo laşan a zedqe du camo Suryoyo-Othuroyo-Kaldoyo-Oromoyo.

Bu konferansano dıdriş ebe a fulhone  dsimi ba sahat da fulhone dıkmaşe u mawtbo umthoyo d’Bethnahrin ba dukothe dıkhoye u cameydan sim fuşoqo cali siyase gawoyto dkito b’Britho u bgawe di siyasate mıkmıntır mu cameydan dsoyım dmote la zedqeyde a umthonoye ba falqe du athro dıkhoye bınne.

Hıdo ma nuqtotho dıkle acla u mafhum dkıtlın a hayle statukoye bu madınho mıscoyo. Bu maşıqlano dkıtyo olsoyo, a hayle du statuko du Madınho Mıscoyo mazıdde a hjomathe dilonoyo cala Mşihoye u calu camaydan. U Qtolğenso dsımwola i Mamlaxtho da Othmanoye bi şato dan 1915 bnişo dmıqşoci a mşihoye mu Madıhno Mıscoyo, kımdawım hol adyawma bsiqume maşhılfe ma athrawotho tuxmonoye u teokrat du qlimo. İ zıhniyathe dkıbco dqışco a came Mşihoye du Madınho Mıscoyo cama timoyothathe amakthabzabnoye u marduthoye, nafiqo ma thume qlimoye u mşahlıfo l’qento tahluka emwothoyto. İda i Othmaniye hathto wi tahrazto di Xilafe dılo mitakliyo, u makthabzabno naqla hreto gıdsohıd cal qtolğenso rabo mqabıl da hiyoywotho, u tawdiyotho entikoye.

MUB bu buyoneyde komır: britho kula sohuthtoyo  dkito zıhniye dkıbco dmankıro i ithutho du camaydan u Suryoyo-Othuroyo-Kaldoyo-Oromoyo u dqışcole. Leşan du medano a şutose u tukose Mşihoye d’Amerika dkıtte asirutho ba şuşote emwothoye dşafici li harake cam gabıd dkıtyo dawse msimonitho, kibe dılo makfe u haylathe dmaklın a hjome dkıbci dqışci u camaydan. Calathe ğalabe olsoyoyo dmıgrış u zuhoro du ray emwothoyo cala medone dıkmicoşi bu Madınho Mıscoyo u cala sayome du qtolğenso dıkımdawmi dqışci u camaydan. U dmimıd u snodo du ray emwothoyo. Midıd a teştıcınye dıkmıştacın a duwal dıha şıkıl, antidemokrat u diktatör du Madınho Mıscoyo, kıtlın darğo dhawbo di noşutho.

MUB bıthır mıd kmahke calu maşıqlo haroyo dı falqo mene kımdawım b’Lebnon komır kmisim teştecınye rafice mu taraf da hayle statukoye laşan dsaymi fıtne u dmamtın acame mqabıl dıhdode. Megabo kmıstacmıli u haylathe u fulhoyo kule wa zaynathe du teknoloji haroyo mqabıl da came, da zawce demoqratoye di hirutho, me gabo hreno kmacbıri fıtne u fasad u kzırci zarco di bcelıdbobutho.

Mathlo lu medano qatlo da rişcaşire Araboye b’Suriya a hayle catumani kito. İ wolitho asasi dkul barnoşo dıksonıd  i hirutho, dlobe aftho la tıştıcınyani dkıbci dmatimi i Mdabronutho Yothoyto du Garbiyo u Madınho d’Suriya

Bu huthomo du buyono d’MUB du konferans  kmisım qrayto li hdoyutho umthoyto dmitahwe ağuno lu camaydan kule me Beyrut li Qamışlo, l’Vadi Nasaraa, lu Daşto d’Ninwe, l’Turabdin u li Golutho. Bu asasano leşan dımşahlıfina i şato dothe l’şato du qmoro du camaydan, dmitakıs, dmıtle u snodo emwothoyo, kmaczımina kul farsufo du camaydan dnofıq moro li wolithayde, dmahwe darqıblo mqabıl da hayle kaboşe u faşist. İ zoxutho gıdhuyo du camaydan dıkımhalıx bi rişonutho di otho dmaclıyolın a sohdaydan.