Klozım dmişajci a mşihoye dı dıcri li mditho d’Mawsal

Menyono ma comure d’Mawsal, tlıblın mi şultonutho du Iraq dsaymo u hethotho da citotho dkıtne b’Mawsal, bnişo dmişajci a Mşihoye lu dcoro li mditho.

 Bebzabno, hın man abne du camaydan dı daciri l’Mawsal, ba maqıblonwotho dsimi acmaye tlıblın mi şultonutho du Iraq dmadcıro u bnoyo da bote meqım ma citotho, leşan a Mşihoye dıqudri ducri li mditho.

 U froshezwo du Iraq d’Almusıliya, sımle maqıblonwotho cam menyono ma comure Mşihoye u Maşılmone dıkhoyın bi fnitho d’Hoş Albeca bi mditho d’Mawsal, laşan dmoyıd mawdconutho cali hzayto dkıtlın mi sbutho du dcoro du camaydan li mditho.

Farsufo mu camaydan dıdacır li mditho d’Mawsal komır “ıno dacırno m’Boğdod li mdithaydi d’Mawsal bıthır mdımgalwewoli l’zabno d’3 ışne mi celtho du kboşo di mditho m’Dacış. Bu zabno dsımwo u huroro du gabo semoloyo d’Mawsal ıno dacırno li mditho 31 bu yarho d’Konun u Haroyo, ıno lhiqoyono li mdithaydi, ubu zabno dımhararwo u gabo yaminoyo d’Mawsal dacırnowa li fnithayde ulu baytaydi dkıtyo b’Hoş Albeca udkımmathlo i dargışto di Mşihoyutho bı Mawsal. Bi fnithathe kito bayn hammış hul şeth citotho catiqe kul hıdo menaye kdocır u makthabzabnayda l’1200 hul 1400 ışne. Ahna heş harkena u kıbcina mu camaydan dıdocır l’Mawsal, cal dımşare ucdo bu bnoyo u hethotho da citotho shife”.

Megabo hreno, farsufo Maşılmono dkıtyo mi fnitho d’Hoş Albeca mırle “u bnoyo da citotho sbutho di şultonuthoyo, lo amasığde uloste acitotho sim u hethothathe hul ucdo. Acitothoste xıda masığde kulle a’bote d’Aloho ne klozım dmisım u bnoyathe me hatho. Kıtlan i cito d’Hoş Albeca wi cito di şuctho u citotho hrene ğalabe dkıtne catiqe bı Mawsal. Hul ucdo lısim u hethothathe, wi celtho du medano latyo idıcto. Anoşe kıbci dıcri. U ahna mu zabno dkıtwan nacime kcayşinawo cama Mşihoye, ulatwo i naqlayo furşono bayn Mşihoyo, Kurdoyo aw Sunne awste Şici, elo i şultonutho klozım dımqadmolın tazminat mqabıl du husrono dıhzelın abotathe, u dbonın i cito d’Hoş Albeca”.

Mexasra hreto, farsufo mu camaydan bi maqırhonutho dhule lu froshezwo d’Almusıliya mırle “ahna kıtlan sabro u ktılbina dhowe u bnoyo da bote meqım mu bnoyo da citotho, cal da Mşihoye hul ucdo lıdaciri l’Mawsal. Mın yuthrono kıtle u bnoyo da citotho, elo ida dmişatsi a’bote mehatho i naqlayo anoşe gıdıcri. İ fnitho d’Hoş Albeca hıdo ma dukotho catiqe dkuleyo bi hiğmonutho d’Ninwe. Kmıtyaqano dıkhoyewo harke b’Hoş Albeca hedor 5 alfo iqrotho Mşihoye”.