Muhhammad Sacıd Qaddour: kito hol 7.400 madırşotho b’dukotho frişe d’Suriya dkıtne ucdo sxire

DARAMSUQ – Lfuth u waziro du yulfono d’Suriya Muhhammad Sacıd Qaddour, kito hol 7.400 madırşotho b’dukotho frişe d’Suriya dkıtne ucdo sxire-ya cal dhzelın husrono rabo-yaste dkıtne a bınyone shife. Bebzabno ma 7.400 madırşotho, mcadıl ucdo 102 u heş kmisım u hethotho dhol 345 madırşotho u sim buhone cal 2.540 bınyone hrene, leşan dmimıd fusqono du hethothathe.

İ wazirutho mbayanla kmo stratejiye leşan dımsafyo u krizano da madırşotho-mathlo, mıdla modell dhowe floğo di mşalutho. Awkith gıdmibayın madırşotho dkıtne fliğe beyn di şultonutho u more dkıtne privat. Hın madırşotho dhariwi gıdmitahwın l’gabe privat leşan u hethotho da bınyonani u mqabıl dathe, gıdhuwyo i mdabronutho da madırşothani bidaye hol zabno u sahmo mu yulfono da yolufe’ste gıdhowe magon.

U waziro du yulfono Qaddour, kali’ste calu ağro da malfone u malfınyotho ucalu şuşotathe bu haqlo du yulfono ba fırce frişe dkito, cali sniqutho du şuşoto du plan du yulfono du teknoloji uda komputere udğer tahrazyotho hrene dkito b’qamuthaye dıklozım dmitafiti la haye, bnişo dmitahwe gado la nacime kulle dımdawmi u yulfonathe ba madırşotho frişe du athro.