Muhjomo oyaroyo d’Turkiya dsımla a comure da qıryawotho du garbiyo du Iraq mahzamlın ma botathe

Ba mowat d’comure dıkhoyın ba qıryawotho du garbiyo du Iraq, mahzamlın ma botathe mi celtho da hjome oyaroye dsımlın atayısyotho folhoye dı Turkiya cala thume di qastra d’Zaxo bi hiğmonutho d’Nuhadra.

 Camgabıdathe, qtil folho Turkoyo bu garbiyo du Iraq ba buğre dmarıs acle mi xasra du İran, ubebzabno a’haylawotho du sutoro du camo di PKK dmahrawlın tarte Holikoptere du gayso Turkoyo bi fnitho d’Haftanin.

 A’tayısyotho Turkoye du qrobo sımlın athmıl hjome oyaroye cala thume di qastra d’Zaxo bi fnitho d’Nuhadra bu garbiyo du Iraq, ubi netije da hjomani ba mowat d’comure maxlelın abotaththe, trelın amulkonaththe u mahzamlın ma qıryawothathe.

Bu tebo dıfris bi dafo d’Pukmedia, mawdıc da tayısyotho folhoye dı Turkiya hjımlın athmıl ba şoce mşawhıre du lalyo, cal qıryawotho u fenyotho dıknıfli cala thume di qastra d’Zaxo, baynothaye i fnitho d’Galle Xamtir, Galle Qasrok, Galle Psağa wi fnitho d’Kaşani. Bi netije da hjomani, friso i zuctho ba lebawotho da comure dıkhoyın ba fenyothani, mawxaste trelın a’bote u qıryawothathe u maftelın fothaye lafi qastra d’Batufa udı Darkar.

Hani kımo yawme ahaylawotho kaboşe dı Turkiya kımdawmi ba hjome dıksaymilın cala fenyotho du garbiyo du Iraq bi dacwa du nfoqo mqabıl da mharbone di PKK. Ubi netije da hjomani qtil menyono dı mdinoye u hawi husrono rabo la mulkone da bnaymothoye.

Me gabo hreno, ahaylawotho du sutoro du camo wa grube di athto hırto d’Star sımlın athmıl, cuqobo mşawtıfo dilonoyo cala haylawotho kaboşe dı Turkiya bi fnitho d’Haftani bu garbiyo du Iraq. Ubi netije du cuqobani mahruw tarte Holikoptıre d’Copra du gayso Turkoyo.

Mexasra hreto, i wazirutho du sutoro dı Turkiya mawdacla adyawma dıqtil ha ma folhayda udımjarıh tıre hrene ba taxtuşe dmarıs aclaye mi xasra da thume dcamu İran. Bu buyono dıfrısla i wazirutho Turkoyto mawdacla da folhayda bu zabno du hjomo dsim aclaye ksaymiwo duyoqo bi qritho d’Yoksikova dıknıflo bu qlimo d’Hakkari calu thumo du İran, elo bu buyonayda i wazirutho du sutoro dı Turkiya lımathkarla manyo dmarısle a’buğre cala folhayda.