Mustafa Karasu hule maqirhonutho hathto-maşiqlo du şlomo udu kenşo demoqratoyo

QANDIL — Bi maqıblonutho dsımle acme u froshezwo d’Media Haber, u hadomo du mawtbo mşablono du tukoso du kenşo Kurdistanoyo di KCK Mustafa Karasu sımle u nuholo du maşıqlo du şlomo udu kenşo demoqratoyo wa gedşe dkowın b’Turkiya ubu madınho mescoyo. 

Karasu cali sbutho di aykanoyutho du rişono di PKK Cabdalla Öçalan b’gawıd du hbuşyayde b’İmrali mırle “u izilasyon kımdawım calu rişono APO. Klozım dımmina u medano. E i aykanoyutho latyo xıd meqım, sim hın liqoyotho, hın ma hawrone zırlın İmrali, elo u medano latyo makfiyono. Du şroro u izilasyon kımdawım m’zabno d’26 ışne, uba 10 ışne haroyani qaşiwo zıd. Hul ucdo a’sniğre wi iqartho d’Öçalan inaqla dkıbci laybın dızzın l’İmrali. U medano qrihoyo. A’yaqrotho da hbişoye hrene wa sniğraththe kibın kul 15 yawme dsaymi socurwotho. Uba yawme du cedo b’şıkıl ftiho kloqın ba hbişoye. E şroroyo dhawi liqoyotho ftihe ba zabne haroyani, elo u izilasyon heş kımdawım, ukım’athır calu maşıqlo du şlomo udu kenşo demoqratoyo”. 

Karasu dmawdacle d’Öçalan dhule funoyo bu şuroyo du yarho dı Tışrın u Qadmoyo li qroyto dsımwole Dawlat Bahçali, ba melani ste mdawamle “i sbutho Kurdoyto kımmathlo i sbutho ulsoyto u rişoyto dkulle laşan dı Turkiya. Wu malolo asasi bi sbuthathe heş kımdawım acle u izilasyon. Laybe dloqe a’folitiqoye. Ida kmıbce dmımte l’şroyo, udmişarıro i ahonutho bayn da Turk wa Kurdoye klozım dmıftıh u darbo b’qamuthıd d’Öçalan udmitahwele aftho dmıştace u dawro dıknofıl acle”. 

Camgabıdathe, Karasu sımle qroyto la hayle semoloye ula demoqratoye dı Turkiya dımtalbi dloqın Öçalan, cal di sbutho Kurdoyto kıtla esore camu dactid dı Turkiya, cami demoqratoyuthayda ucami hiruthayda, u mırle “mın gıdhowe u dactid da semoloye uda demoqratoye?. U medano masroyo cami sbutho Kurdoyto. Hano qrihoyo, ida dlımışroyo i sbutho Kurdoyto gdımdawmi a’hbose cala semoloye ucala demoqratoye. Ucdo kito şkuwat bi sbutho da hbose dıksaymolın Turkiya, mınyo u medano dıkxolıq u muzoğano?. Qay lımşahlıf u muzoğano b’Turkiya?. U funoyo hanoyo cal di sbutho Kurdoyto lımqafe ela şroyo. Klozım kul noşo dodıc u medano udımqadım calu asasno. Uloste a’mamle di hirutho udi demoqratoyutho gahxo dcali nafşone”.