Nikol Paşinyan: ‘Armenia holucdo, lo hzela yuthrono mi mawdyonutho dhawile u kenşo Emwothoyo bu qtolğenso dsımwo bi şato dan 1915’

YEREVAN — Yawme d’Hamşo dşafıcina, u tagoro u gelyunoro du camaydan Patrick Bet David, sımwole maqıblonutho bu darbo du Youtube camu rişwazire d’İsroyel Benyamen Netanyahu u mşayewole, qay İsroyel lıkmawdıyo bu Sayfo dsımwola i mamlaxtho da Cuthmanoye calu camaydan calan Armınoye ucala Yawonoye bu zabno du qrobo qamoyo dbritho.

Bu funoyayde Netanyahu mawdacwole, dıkmawde bu Sayfo, u Turkiya’ste bıthır baroyo, mahwewola hfuxyo qaşyo. Cali sbuthathe, mfanele u rişwazire d’Armenia Nikol Paşinyan a şwole da gelyunore u mawdacle, di mawyonutho dhawyo me athrawotho frişe bu qtolğenso dsim calu camo Armınoyo, heş holucdo lo huwla şıkıl d’yuthrono lo lu athro u loste lu camo.

Paşinyan mırle; Klozım bi qamayto dfuhmina-kıbcina di mawdyonuthathe du qtolğenso dan Armınoye dhuwyo ale geopolitik b’ide dğer athrawotho, dlatte aya asirutho bi sbutho du athraydan uda yuthronayde? Kıbcina du qtolğenso dmibahıs acle bşıkıl tassaduf? Ono lo kobacno dmahıtno a Sohdaydan bhawxa şıkıl d’droşo. Ahna klozım dobina u yuqro la yuthrone du athraydan.

Paşinyan mırle’ste; Ucdo kito mınyono celoyo d’athrawotho dmawdelın bu qtolğenso dan Armınoye-toxu mıftakrina, holucdo mın qmırlan u mıqa mıstafadlan mi mawdyonuthathe. Hani kulle dmawdelın, mıstacmelın u qtolğenso bi kampanya da guboyathe ulo lu yuthrono du camo Armınoyo.

Elo Paşinyan wi şultonuthayde, ğalabe naqlat’ste mawdaclın, di mawdyonutho bu qtolğenso dan 1915 lo kuthyo bi qadmoyutho di siyasathe u cam Turkiya’ste mahıtwolın i klaytathe. Calathe’ste ğalabe Armınoye u yadıcthone dcala qtolğense, krıhwolın u qedomano d’Paşinyan u mawdıc, dlo kobe yasifutho lu qtolğenso barbroyo dsımwo calu camayde mi mamlaxtho Cuthmanoyto.