Nucman Kurtulmuş mawdacle dgıdmişakıl sictho mu parlamento dgdıfulho xıd funoyo li qroyto dsımle Öçalan

ANKARA – U rişono du parlamento dı Turkiya Nucman Kurtulmuş, sımle athmıl socurutho la tre rişone zawgoye du gabo di şawyutho udi demoqratoyutho da came dı DEM parti Tulay Tülay Hatimoğulları u Tunjer Bakirhan. Lfuth u ajans d’Mezopotamia, u knuşyano sim bu benyono du parlamento sxiro lu tboco froso, ubu huthomayde a’tre gabe frıslın buyono mşawtfo.  

I rişonitho zawgoyto dı DEM parti Tülay Hatimoğulları bi maqırhonutho dhula lu tboco froso mırla;

“adyawma u maşıqlo dkımqadmina ebe laf qudmo, kmatcın u parlamento mşalınwotho makthabzabnoye dkıtne masre bu bnoyo du şlomo udi demoqratoyutho. Bıqrihutho drışlan a’sebwothani, ukımqadmina tawdiyotho lu rişono du parlamento cali socurutho dsımlelan“. 

M’gabo hreno, u rişono du parlamento Kurtulmuş bu mamlo dsımle mawdacle di lqoytathe drişo eba i mşalutho dıknıflo calu parlamento bu teqwiyo di hdoyutho athronoyto, bu fhomo mşawtfo ubu tfoko da prensibe demoqratoye b’Turkiya laf qudmo, u mırle;

“bıthır mu buyono dıfris m’İmrali, ubıthır mu şudoco du tekliyo da taxtuşe, i sbutho matyo l’darğo dkibe fayış dmıdroşo b’gawıd du parlamento dkıtyo i nuqazto du sebyono athronoyo wu lebo di demoqratoyutho dı Turkiya. Ahna kmawdena da gabe folitiqoye kulle klozım bi ruho di mşalutho dımqadmi li afthathe i makthabzabnoyto, bnişo dmımte l’netiçe msarhabto, udmibayın aginda siyasi hathto b’Turkiya. Kıtli sabro di sictho du parlamento dgıdmişaklo ba yawme dıbqamuthayna, dfulho b’şıkıl hfito, u ahna gıdırşina u şıkıl du haykılo di sictho wi tahrazto da fulhonayda, u gdımtaybina a’hıdriyat qamoye bu şıkıl dıkşowe lu medano“. 

M’gabo hreno, u rişqutno dı Turkiya Rejeb Tayeb Erdoğan mhanele i qoyumto dı DEM parti Pervin Buldan, cal dımnaqyo tahlufto lu rişono du parlamento mdarbıd du qoyumo Sıri Suraya Önder dınqil ma hayani.